दाङ,१५ बैशाख - बरिष्ठ साहित्यकार एवं पत्रकार नारायणप्रसाद शर्माले सभ्य समाज निर्माण गर्न मानवीय मूल्यमा आधारित शिक्षा आवश्यक रहेको बताउनुभएको छ । गोरखा इन्टरनेशनल पव्लिक सेकेण्डरी स्कुल घोराहीले आफ्ना विद्यालयका बालबालिकाका लागि आयोजना गरेको तीन दिने कथा लेखन कार्यशाला समापनलाई सम्बोधन गर्दै उहाँले यस्तो धारणा राख्नुभएको हो ।

उहाँले सभ्य समाजका लागि असल नागरिक आवश्यक रहेको र असल नागरिक तयार पार्न मानवीय मूल्यसहितको शिक्षा आवश्यक रहेको बताउनुभयो । मुलुकमा शिक्षित र दक्ष जनशक्ति बढ्दै जानु राम्रो भए पनि तिनैले बढी भ्रष्टाचार गरिरहेको, अन्याय अत्याचार गरिरहेको उल्लेख गर्दै शर्माले जान्नेसुन्ने र ठूला भनिनेहरुले नै देश बिगारिरहेकाले जो जुन पेशा र क्षेत्रमा क्रियाशील भए पनि उसलाई असल बनाउने शिक्षा आवश्यक रहेको बताउनुभयो ।

उहाँले विश्वमा भाषा र लिपिको विकास हुनुभन्दा पहिलेदेखि नै एकले अर्कोलाई कथा सुनाउने प्रचलन रहेकाले कथा विधा मानव सभ्यताको महत्वपूर्ण विधा रहेको बताउनुभयो । शर्माले विश्वमा सयौं वर्षअघिदेखि कथा विधाको विकास भए पनि नेपाललमा शासकहरुले जनताका छोराछोरीसम्म चेतनाको जागरण पुग्न नदिएकाले ९० वर्षअघि अर्थात विसं १९९२ देखि मात्रै कथा प्रकाशनको इतिहास सुरु भएको र त्यसको आरम्भ शारदा पत्रिकाले गरेको बताउनुभयो । उहाँले कथा समाजकै उपज भएकाले यसले मानिसको मन छुनुपर्ने बताउनुभयो । कथा, कविता लगायत साहित्यका सबै विधाले समाजलाई असल बनाउने र देशलाई अगाडि बढाउनुपर्ने उल्लेख गर्दै उहाँले साहित्यको रचना अग्रगमनका लागि हुनुपर्ने उहाँले बताउनुभयो ।

साहित्यकार सुन्दर गौतमले सभ्य समाज निर्माण गर्न असल शिक्षक र असल साहित्यकार आवश्यक रहेको बताउनुभयो । उहाँले असल शिक्षकले असल नागरिक तयार पार्ने र असल साहित्यकार बेथितिविरुद्ध बोल्ने भएकाले यसतर्फ जोड दिनुपर्ने बताउनुभयो ।

नेपाल बाल साहित्य समाजका अध्यक्ष एवं प्रशिक्षक विजयराज आचार्यले कक्षा कोठा विभिन्न विधाका प्रतिभाहरुको संगमस्थल भएकलाई उनीहरुको पहिचान गरी सहजीकरण गर्नु नै आजको साँचो र प्रगतिशील शिक्षण विधि भएको बताउनुभयो । अभिभावक र शिक्षकको रोजाइमा होइन बालबालिकाको रुचिका आधारमा अध्ययन अध्यापन अघि बढाउनुपर्ने र कथा लेखन बाल मनोविज्ञानको महत्वपूर्ण उपचार विधि पनि भएको उहाँले स्पष्ट गनुभयो ।

विद्यालयका प्राचार्य मानसिंह घर्ती मगरको अध्यक्षतामा भएको कार्यक्रममा राप्ती साहित्य परिषद्का अध्यक्ष डा. टीकाराम उदासी र प्याव्सन घोराहीका अध्यक्ष बालकृष्ण ओली शुभकामना दिनुभएको थियो । सो क्रममा कार्यशालामा सहभागी विद्यार्थीहरु प्रतिक्षा चौधरी, सदीक्षा बुढा मगर, सम्झना बुढा मगर, प्रिन्सिका पोख्रेल, आज्ञा धिताल, अनिशा ओली, चिनाची घर्ती मगर र श्रेया धितालले कथा वाचन गर्नुभएको थियो ।

सहभागीको तर्फबाट विद्यार्थीहरु शिशिर पोख्रेल, वर्षा पोख्रेल, सफल ओली, आशिका बुढा र आशिका ओलीले कार्यशालाको अनुभूति राख्नुभएको थियो । विद्यार्थी अनुभूति बुढा मगरको स्वागत मन्तव्यबाट सुरु भएको कार्यक्रम सञ्चालक विद्यार्थीहरु संज्ञान अधिकारी र सनिसा बुढाले गर्नुभएको थियो । साभार : खाेज रफ्तार