दाङ - दाङकाे घोराही उपमहानगरपालिकाले उपमहानगरपालिकाको बजार क्षेत्रमा ठेलामा घुमाएर आइसक्रिम बेच्न बन्द गर्ने निर्णय गरेको छ । वडा नम्बर १४ र १५ को मुख्य बजार क्षेत्रमा ठेलामा घुमाएर आइसक्रिम बेच्न नदिने भएको हो ।

प्रमुख प्रशासकीय अधिकृत ऋषिराम केसी, सरोकारबाला आइसक्रिम उत्पादक, ठेला व्यवसायी, नगरको उपभोक्ता हित संरक्षण शाखा, नगर प्रहरी, पत्रकारलगायतको उपस्थितिमा भएको छलफल पश्चात् क्षेत्र तोकेर ठेला निषेध गर्ने निर्णय भएको घोराही उपमहानगरपालिकाका सहायक केमिस्ट गणेश रेग्मीले जानकारी दिनुभयो । घोराही उपमहानगरपालिका उपभोक्ता हित संरक्षण शाखाका प्रमुख मोहन सिंह सुनारले अस्पतालले र विद्यालय वरपर पनि आइसक्रिम ठेला नराख्ने गरी निर्णय भएको जानकारी दिनुभयो । उहाँले नियम विपरीत निषेध गरिएको क्षेत्रमा ठेलामा आइसक्रिम बेचेको पाइए फिर्ता नहुने गरी ठेला समेत जफत गरिने जानकारी दिनुभयो ।

‘घोराही उपमहानगरपालिका भित्र प्याकिङवाला र रङ मिसाइएको आइसक्रिम उत्पादन गर्ने कुनै पनि आइसक्रिम उत्पादक व्यवसायीहरुले अनिवार्यरुपमा खाद्य प्रविधि तथा गुण नियन्त्रण कार्यालयबाट खाद्य अनुज्ञापत्र लिने, खाद्य अनुज्ञापत्र नलिएसम्म आइसक्रिम उत्पादन बन्द गर्ने निर्णय भएको छ’– उहाँले भन्नुभयो– ‘खाद्य अनुज्ञापत्र आवश्यक नपर्ने सादा सोलीवाला आइसक्रिम बेच्ने ठेला व्यवसायका हकमा सम्बन्धित वडा कार्यालयमा व्यवसाय दर्ता गराई तोकिएको बजार क्षेत्रभन्दा बाहिर, विद्यालय र अस्पताल बाहेकका क्षेत्रहरुमा आइसक्रिम ठेला व्यवसाय सञ्चालन गर्न अनुमति दिने निर्णय भएको छ ।’

उहाँले निर्णयहरु नमाने अटेर गरी जथाभावी रुपले आईसक्रीम ठेला व्यवसाय सञ्चालन गरेको पाइएमा ती ठेलाहरु नियन्त्रणमा लिई सामानहरु नष्ट गर्ने निर्णय भएको पनि जानकारी दिनुभयो । उहाँका अनुसार रझेना बरपिपल चोक, राप्ती स्वास्थ्य विज्ञान चोक, ट्राफिक चोक, चन्द्र सुर्य पेट्रोल पम्प, पनौरा चोक, गुलरिया चोक, दीपशिखा चोक, तामा रेष्टुरेन्ट चोक (तुलसीपुर जाने गाडी लाग्ने चोक), बालमन्दिर चोक, लखनपार्क चोक र नेपाल टेलिकम चोकलाई गालाकार मानेर त्यसक्षेत्रभित्र ठेलामा आइसक्रिम निषेध गरिएको छ । साभार : युगबोध