दाङ, २० चैत - दाङको तुलसीपुर –८ स्थित अश्वारा सामुदायिक वनमा लागेको आगो ९ घण्टापछि नियन्त्रणमा आएको छ । आगो आज दिउँसो ३ बजे मात्रै नियन्त्रणमा आएको सव डिभिजन वन कार्यालय तुलसीपुरका प्रमुख प्रकाश ढकालले जानकारी दिनुभयो ।

आगोबाट सयौँ प्रजातिका हजारौ ससाना बोटबिरुवाहरू, वन्यजन्तु तथा पंक्षिका बासस्थान जलेर नष्ट भएका छन् भने जैविक विविधतामा ठूलो क्षति पुगेको डिभिजन प्रमुख ढकालले बताउनुभयो । सामुदायिक वनको करिब एक सय हेक्टर क्षेत्रफलमा आगो फैलिएको थियो ।

आगोलाई  १९ नम्बर बाहिनी अड्डा तुलसीपुरबाट खटेको नेपाली सेना, इलाका प्रहरी कार्यालय तुलसीपुरबाट गएको नेपाल प्रहरीको टोली, सव डिभिजन वन कार्यालय तुलसीपुरका वन कर्मचारी र उपभोक्ता, तुलसीपुर उपमहानगरपालिकाको दमकलको सक्रियतामा नियन्त्रणमा लिएको वन समूहका अध्यक्ष हेमा डाँगीले जानकारी दिनुभयो ।

सुरुमा आगोलाई नियन्त्रणमा लिन उपभोक्ताहरूले प्रयास गरेपनि सम्भव नभएपछि सेना, प्रहरी, दमकल र वन कार्यालयलाई खबर गरिएको थियो ।  सामुदायिक वनको क्षेत्रफल २ सय ४१ हेक्टर क्षेत्रफल रहेको छ । बिहान ७ बजेदेखि आगो निभाउन सुरु गरिएको थियो ।

यसै बीच सामुदायिक वन उपभोक्ता समूहका अध्यक्ष हेमा डाँगी र सचिव डिलाकुमारी देवकोटाले एक प्रेस विज्ञप्ति जारी गर्दै सामुदायिक वनमा लागेको आगो नियन्त्रणमा सहयोग गर्ने, नेपाली सेना, नेपाल प्रहरी, वन कर्मचारी, उपभोक्ता तथा तुलसीपुर उपमहानगरपालिकालाई धन्यवाद ज्ञापन गर्नुभएको छ ।  साभार :तुलसीपुर खबर