भालुवाङ, १६ चैत - लुम्बिनी प्रदेशसभा सदस्य तथा पूर्वमन्त्री इन्द्रजित थारूले पत्रकारहरूलाई सचेत र जिम्मेवार भएर कलम चलाउन आग्रह गर्नु भएको छ।

शनिबार राप्ती गाउँपालिका-३ मसुरीयामा सम्पन्न राप्ती प्रेस मञ्चको प्रथम साधारणसभा तथा अधिवेशनलाई सम्बोधन गर्दै थारूले सञ्चार क्षेत्रको संवेदनशीलता औंल्याउँदै निष्पक्ष र जिम्मेवार पत्रकारिताको आवश्यकता रहेको बताउनुभयाे। उहाँले भन्नुभयो, "पत्रकारिता समाज परिवर्तनको मुख्य आधार हो। सत्य, निष्पक्षता, र जिम्मेवारीसहित कलम चलाउनु सबै पत्रकारहरूको कर्तव्य हो।"

उहाँले देउखुरी उपत्यका लुम्बिनी प्रदेशको राजधानी भएसँगै यहाँका पत्रकारहरूलाई स्थापित हुने अवसर प्राप्त भएको उल्लेख गर्दै पत्रकारिता पेशामा थप सतर्कता र अनुशासन आवश्यक रहेको बताउनुभयो। "पत्रकारितामा कुनै प्रकारको पूर्वाग्रह वा दबाब हुनुहुँदैन। सत्यको पक्षमा उभिएर, समाजलाई सुसूचित गर्ने दायित्व पत्रकारहरूको हो," उहाँले थप्नुभयाे।

राप्ती प्रेस मञ्चको नयाँ कार्यसमिति चयन

राप्ती प्रेस मञ्चको अधिवेशनले अर्जुन कुमार अधिकारीको अध्यक्षतामा १३ सदस्यीय नयाँ कार्यसमिति निर्विरोध चयन गरेको छ। समितिमा वरिष्ठ उपाध्यक्ष सन्तोष कुमार गुप्ता, खुल्ला उपाध्यक्ष बलराम शाही (भिसुन), महिला उपाध्यक्ष हुमा सुनार, महासचिव ओमप्रकाश गुप्ता, सचिव देवेन्द्रराज कंडेल (श्रीधर), कोषाध्यक्ष लक्ष्मी पोख्रेल रहनु भएको छ।त्यस्तै सदस्यहरूमा मुक्तिराम पौडेल, लालमणी भुसाल, मोतीराम भट्टराई र निसा कुमारी चौधरी निर्वाचित हुनु भएको छ।

नव निर्वाचित कार्यसमितिलाई निर्वाचन समितिका संयोजक दामोदर भण्डारीर सदस्यहरु तुल बहादुर कवँर मगर र बिदुर एमसीले प्रमाणपत्र प्रदान गर्नु भएको थियो।

पत्रकार महासंघ सदस्य र पत्रिका वितरकलाई सम्मान

सो अवसरमा राप्ती प्रेस मञ्चले नेपाल पत्रकार महासंघ लुम्बिनी प्रदेश समिति सदस्य ओमप्रकाश गुप्तालाई सम्मान गरेको छ। साथै, लामो समयदेखि पत्रपत्रिका वितरण गर्दै आएका भालुवाङ निवासी टुकबहादुर खत्रीलाई नगदसहित सम्मान प्रदान गरिएको थियो।

कार्यक्रममा विभिन्न दलका प्रतिनिधिहरू, व्यवसायी तथा सामाजिक अभियन्ताहरूले शुभकामना मन्तव्य व्यक्त गर्नु भएको थियो। कार्यक्रमको सञ्चालन महासचिव ओमप्रकाश गुप्ताले गर्नु भएको थियो।