मसुरीया, १५ चैत - दाङको राप्ती गाउँपालिकाका प्रमुख प्रशासकीय अधिकृत देविराम पाठकले सेवा प्रवाहलाई प्रभावकारी बनाउन वडा सचिव, प्राविधिक कर्मचारी र स्वास्थ्य संस्थाका प्रमुखहरूसँग शुक्रबार छुट्टाछुट्टै छलफल गर्नुभएको छ।
प्यूठानको सरुमारानी गाउँपालिकाबाट सरुवा भई राप्ती गाउँपालिकामा आएपछि पाठकले सेवा प्रवाहलाई सहज र प्रभावकारी बनाउने तथा समस्या समाधानका उपायहरू खोज्न यस्तो पहल सुरु गर्नुभएको हो।

वडा सचिवहरूसँगको छलफलमा प्रशासनिक सुधार, नागरिकले सेवा लिँदा भोग्ने समस्याको पहिचान र तिनको समाधानबारे छलफल गर्नुभएको थियो। सचिवहरूको भूमिका जनमुखी सेवा प्रवाहका लागि महत्त्वपूर्ण रहेको उल्लेख गर्दै पाठकले थप जिम्मेवार भएर काम गर्न निर्देशन दिनुभयो।

प्राविधिक कर्मचारीहरूसँगको छलफलमा पाठकले गाउँपालिकाभित्र भइरहेका विकास निर्माणका कामहरूको प्रगति, गुणस्तर र समयसीमाबारे जानकारी लिनुभएकाे थियो। विकास निर्माणले नागरिकको जीवनस्तर सुधार्ने भएकाले कामको गुणस्तरमा विशेष ध्यान दिनुपर्नेमा उहाँले जोड दिनुभयो।

स्वास्थ्य संस्थाका प्रमुखहरूसँग छलफल गर्दै  उहाँले स्वास्थ्य संस्थामा आवश्यक जनशक्ति, औषधि आपूर्ति र सेवा प्रवाह सहज बनाउन विशेष ध्यान दिनुपर्ने बताउनुभयो। नागरिकलाई गुणस्तरीय सेवा दिन स्वास्थ्य संस्थाले हरसम्भव प्रयास गर्नुपर्ने उहाँले भनाइ थियो।

छलफलमा सहभागी कर्मचारीहरूले आफ्ना क्षेत्रका समस्याहरू र समाधानका उपायहरू बारे जानकारी गराउनु भएको थियो। पाठकले ती समस्याहरू समाधान गर्न आवश्यक कदम चाल्ने प्रतिबद्धता व्यक्त गर्दै यस्ता छलफलले सेवा प्रवाह र विकास कार्यलाई प्रभावकारी बनाउन महत्वपूर्ण भूमिका खेल्ने बताउनुभयो।

उहाँले आगामी दिनमा पनि नियमित रूपमा कर्मचारीहरूसँग छलफल गर्ने योजना रहेको जानकारी दिनुभयो।