११ चैत, दाङ – भूमी समस्या समाधान आयोग दाङले जिल्लाका विभिन्न स्थानीय तहका जनप्रतिनिधी, प्राविधिक कर्मचारी र सरोकारवालाहरु सँग अभिमुखिकरण र अन्तरक्रिया कार्यक्रम सम्पन्न गरेको छ । सोमबार घोराही र तुलसीपुर उपमहानगरपालिकासहित बंगलाचुली, दंगीशरण, शान्तिनगर र बबई गाउँपालिकाका जनप्रतिनिधी, प्राविधिक कर्मचारी र सरोकारवालाहरु सँग अभिमुखिकरण तथा अन्तरक्रिया कार्यक्रम सम्पन्न गरिएको हो ।

भुमि आयोग दाङका अध्यक्ष हुकुम बस्नेतको अध्यक्षतामा भएको कार्यक्रममा आयोगका केन्द्रिय अध्यक्ष हरिप्रसाद रिजालले अबको ३ बर्ष भित्र भुमिहिन दलित तथा भुमिहिन सुकुम्बासीहरुलाई जग्गाको मालिक बनाउने दाबी गर्नुभयो । कार्यक्रमका प्रमुख अथितिसमेत रहनुभएको अध्यक्ष रिजालले अब यही आयोगले नै सबै लालपुर्जा वितरणको काम गर्ने बताउदै सबै नागरिकलाई ढुक्क भएर बस्न आग्रह गर्नुभयो । यसमा स्थानियतहहरुको झनै महत्वपुर्ण भुमिका रहने बताउदै उहाँले स्थानियतहलाई छिटोछरितो काम गर्न आग्रह गर्नुभएको छ ।
यस्तैगरी  कार्यक्रमका विशिष्ट अतिथी प्रमुख जिल्ला अधिकारी कृष्ण प्रसाद लम्सालले भूमिहीनहरूको पहिचान देखि लिएर प्रमाणीकरण गर्ने कार्य स्थानीयतहरुको रहेकाले पालिका प्रमुखहरूलाई वास्तविक भूमिहीनहरूलाई नछुटाउन आग्रह गर्नुभयो । आयोगका जिल्ला सदस्य हिरा देवि पुनले विगत लामो समयदेखि भूमिहिन अवस्थामा रहेका व्यक्तिहरूलाई जग्गा उपलब्ध गराउन आयोगले काम गर्ने प्रतिवद्धता व्यक्त गर्नुभएको थियो ।

कार्यक्रममा भुमि आयोगका केन्द्रिय विज्ञ सदस्य डा. जगत बस्नेतले तत्थ्यांक सार्वजनिक गर्दै दाङमा ६९ हजार ५ सय ३२ लगत संकलन गरिएको जानकारी गराउनुभयो । जसअनुसार भुमिहिन दलितको ६ हजार ५ सय ३, भुमिहिन सुकुम्बासीको १० हजार ९ सय ९५ र अव्यवस्थित बसोबासीको ५२ हजार ३४ लगत संकलन गरिएको छ । दाङका १० वटा पालिकामध्य तुलसीपुर उप–महानगरपालिकामा सबैभन्दा धेरै १७ हजार ८ सय ८५ लगत संकलन गरिएको छ ।
त्यसैगरी घोराहीमा १६ हजार ३ सय ३२, गडवामा ७ हजार ३ सय ९९, दंगीशरणमा ३ हजार ८ सय ४, शान्तिनगरमा ३ हजार ५ सय ८९, बंगलाचुलीमा ९ सय ६३, बइईमा ४ हजार ६ सय ६७, राजपुरमा ४ हजार ४, राप्तीमा ४ हजार ७ सय २८ र लमहमिा ६ हजार १ सय ६१ लगत संकलन गरिएको विज्ञ सदस्य बस्नेतले बताउनुभयो । यसैगरी देशभर अव्यवस्थित बसोबासिहरुको ८ लाख ४५ हजार ९७ लगत संकलन गरिएको छ भने १ लाख ६५ हजार २ सय १८ भुमिहिन सुकुम्बासी र ८६ हजार ९ सय ८३ भुमिहिन दलितको लगत संकलन गरिएको छ । साभार : खोज रफ्तार