सिसहनियाँ,५चैत -  दाङको राप्ती गाउँपालिका वडा नं. ५ पुनखोलामा तीन दिने महिला क्षमता विकास तथा सशक्तीकरण कार्यक्रम मंगलबार सम्पन्न भएको छ।

राप्ती गाउँपालिका महिला, बालबालिका तथा जेष्ठ नागरिक शाखाको आयोजनामा सञ्चालित उक्त कार्यक्रममा ३० जना महिलाहरूको सहभागिता रहेको थियो।

समापन कार्यक्रममा बाेल्दै गाउँपालिकाका अध्यक्ष प्रकाश विष्टले महिलाहरूको आत्मनिर्भरता, सामाजिक सहभागिता र नेतृत्व विकासका लागि यस्ता तालिमहरू प्रभावकारी हुने बताउनुभयो।

उहाँले महिला सशक्तीकरणका लागि आर्थिक, शैक्षिक तथा कानूनी ज्ञानको आवश्यकताको उल्लेख गर्दै गाउँपालिकाले आगामी दिनमा समेत यस्ता कार्यक्रमहरूलाई निरन्तरता दिने बताउनुभयो।

साथै, उहाँले समाजको समुन्नति महिलाहरूको सशक्तीकरण बिना सम्भव नभएको बताउँदै सहभागी महिलाहरूलाई आफ्नो क्षेत्रमा सिकेका ज्ञान र सीपलाई व्यवहारिक रूपमा प्रयोग गर्न आग्रह गर्नुभयो।

त्यस्तै, महिला, बालबालिका तथा जेष्ठ नागरिक शाखा प्रमुख जीवन कुमारी जिसीले महिला अधिकार, लैंगिक समानता, आत्मनिर्भरता तथा नेतृत्व विकास विषयमा प्रशिक्षण दिनुभएको थियो। उहाँले महिलाहरूलाई स्वास्थ्य, शिक्षा, रोजगार र सामाजिक सहभागिताका अवसरहरूमा कसरी अगाडि बढ्न सकिन्छ भन्ने बारेमा विस्तृत जानकारी दिनुभएको थियो।

पञ्जीकरण शाखा प्रमुख नारायण बहादुर राउतले महिला सशक्तीकरणमा कानूनी पहिचानको महत्त्व र नागरिकता सम्बन्धी कानूनी प्रावधानहरू विषयमा प्रशिक्षण दिनुभएको थियो। उहाँले महिलाहरूलाई कानूनी अधिकार, नागरिकता प्राप्ति प्रक्रिया, विवाह दर्ता, जन्म दर्ता तथा अन्य कानूनी प्रक्रियाहरूबारे विस्तृत जानकारी गराउनुभएको थियो।

कार्यक्रममा सहभागी महिलाहरूले यस्ता तालिमहरूले आफ्नो आत्मविश्वास बढाएको, समाजमा नेतृत्व लिन प्रेरित गरेको तथा आर्थिक रूपमा आत्मनिर्भर बन्न सहयोग पुगेको प्रतिक्रिया दिएका छन्। साथै, उनीहरूले आगामी दिनमा पनि यस्ता उपयोगी तालिमहरू निरन्तर सञ्चालन गर्न माग गरेका छन्।