भालुवाङ - दाङको राप्ती गाउँपालिकाले बिहीबार विशेष समारोहको आयोजना गर्दै आफ्नो नवौँ स्थापना दिवस भव्य रूपमा मनाएको छ।

विशेष समारोहकाे उद्घाटन प्रतिनिधि सभा सदस्य तथा पूर्वमन्त्री मेटमणी चौधरीले गर्नु भएको थियो।

साे अवसरमा बाेल्दै प्रमुख अतिथि चौधरीले स्थानीय तहको आर्थिक विकासका लागि सबैको सहयोग आवश्यक रहेको बताउँदै संघ तथा प्रदेश सरकारको अनुदानसँगै स्थानीय स्रोत साधनको अधिकतम उपयोग गरी आर्थिक समृद्धि हासिल गर्नुपर्नेमा जोड दिनुभयो ।

त्यस्तै लुम्बिनी प्रदेशका पूर्वमन्त्री तथा प्रदेशसभा सदस्य इन्द्रजित थारुले जनताको सेवालाई प्रभावकारी बनाउन स्थानीय निजामती ऐनलाई अझ सबल बनाउन आवश्यक रहेको उल्लेख गर्नुभयाे। प्रदेश राजधानीलाई व्यवस्थित गर्न जग्गा एकीकरण पहिलो प्राथमिकता भएको बताउँदै उहाँले हाल त्यसको कार्यान्वयन तयारीमा जोड दिइएको जानकारी गराउनुभयाे। राजधानी व्यवस्थापनका लागि २० वर्षको समय र २ खर्ब बजेट आवश्यक पर्ने उहाँले बताउनुभयो। साथै, उहाँले राप्ती चक्रपथको बाँकी काम शीघ्र सम्पन्न गर्न आफ्नो ध्यानाकर्षण भएको बताउनुभयाे।

त्यस्तैगरी सविधानसभा सदस्य दामा शर्माले संघर्षबाट ल्याएको सरकार त्यसमा पनि नजिकको सरकार स्थानीय सरकार भएको बताउँदै उहाँले जनताको घरदैलोमा सरकार कसरी पु¥याउने भन्ने विषयमा गम्भीर बन्न जरूरी रहेको बताउनु भयो । त्यस्तै उहाँले जनतालाई पनि सरकारलाई बेला बेलामा घचघचाए मात्र नागरिकको सरकार बन्न सक्ने बताउनु भयो । उहाँले राप्ती गाउँपालिका कृषिमा अब्बल पालिका भएकोले उत्पादन सँग पालिकालाई कसरी जोड्न सकिन्छ र किसानको उत्पादन र बजारीकरणमा ध्यान दिएकोमा आभार प्रकट गर्नु भयो । उहाँले शिक्षा, स्वास्थ्यमा पनि पालिकाले राम्रो काम गरेको बताउनुभयो ।

गाउँपालिका अध्यक्ष प्रकाश विष्टको अध्यक्षतामा सम्पन्न कार्यक्रममा विभिन्न क्षेत्रका व्यक्तित्वलाई सम्मान तथा पुरस्कार प्रदान गरिएको थियो। साइकल दौड प्रतियोगिताका विजेता, उत्कृष्ट विद्यालय, शिक्षक, विद्यार्थी, किसान, उद्यमी, कर्मचारी, पत्रकार तथा उत्कृष्ट करदातालाई सम्मान गरिएको थियो ।

सामुदायिक विद्यालयतर्फ उत्कृष्ट नतिजा ल्याउने विद्यार्थीहरूलाई शहीद श्रीनारायण स्मृति पुरस्कार, शहीद राधाऋषि स्मृति पुरस्कार र शहीद राम-प्रकाश स्मृति पुरस्कार प्रदान गरिएकाे थियो। संस्थागत विद्यालयतर्फ पनि विभिन्न विद्यार्थीहरू पुरस्कृत भएका थिए।

कार्यक्रममा आदर्श नमुना माध्यमिक विद्यालय लालमटिया उत्कृष्ट विद्यालय घोषित हुँदै सम्मान गरिएको थियो। कृषि तथा उद्यमशीलता प्रवर्द्धनमा योगदान दिएका राप्ती केरा प्रवर्द्धन समूह, रम्तेल सहकारी संस्था, राप्ती गार्मेन्ट उद्योगलगायतलाई पुरस्कृत गरियो। सबैभन्दा बढी व्यवसाय कर तिर्ने श्री जनउत्थान सामुदायिक लघुवित्त संस्था लिमिटेडलाई पनि विशेष सम्मान प्रदान गरिएकाे थियो ।

संघसंस्थातर्फ आशाका किरण संस्था, इलाका प्रहरी कार्यालय भालुवाङ, शसस्त्र प्रहरी बल ज्वालामाई गण भालुवाङ सम्मान गरिएको थियो। दीर्घ सेवा सम्मानतर्फ महिला विकास निरीक्षक जीवन कुमारी जिसी, उत्कृष्ट कर्मचारी तर्फ अधिकृतस्तरकी भारती सन्यासी, सहायकस्तरकी असिस्टेन्ट सव इन्जिनियर विमला भट्टराई, सूचना सम्पादन तथा अभिलेखकर्ता तुल बहादुर कवँर मगरलाई सम्मान गरिएकाे थियो ।

पत्रकारिता सम्मानतर्फ देउखुरी टुडेका अध्यक्ष सन्तोष कुमार गुप्ता, राप्ती प्रेस मञ्चका अध्यक्ष अर्जुन कुमार अधिकारी, हाम्रो लुम्बिनी न्युज डटकमका बासुदेव न्यौपाने, सिधापत्र अनलाइनकि इराधा झाक्री मगर,दंगाली अनलाइन खबरका मुक्तिराम पौडेल लगायतका पत्रकारहरू पुरस्कृत हुनु भएको थियो ।

सो अवसरमा गाउँपालिकाकाे मुखपत्रकाे रुपमा  "उज्यालो राप्ती"पुस्तककाे लाेकार्पण समेत गरिएको थियो ।
कार्यक्रममा मुख्यमन्त्री तथा मन्त्रिपरिषद् कार्यालयका निमित्त प्रमुख सचिव ईश्वरराज पौडेल, जिल्ला समन्वय समिति दाङका प्रमुख नित्यानन्द शर्मा, गढवा गाउँपालिकाका अध्यक्ष यमनारायण शर्मा पोख्रेल लगायतका वक्ताहरूले शुभकामना मन्तव्य व्यक्त गर्नु भएको थियो ।

गाउँपालिकाकी उपाध्यक्ष कमलापति चौधरीले स्वागत मन्तव्यबाट सुरु भएको कार्यक्रमको सञ्चालन शिक्षा, युवा तथा खेलकुद शाखा प्रमुख विश्वास विकले गर्नु भएको थियो ।

स्थापना दिवसका अवसरमा फागुन २७ गते पालिकाका ९ वटै वडामा वृहत सरसफाइ कार्यक्रम गरिएको थियो भने फागुन २८ गते बिहान "प्रकृतिसँगै दौडौँ, पर्यापर्यटन बढाएर विकासमा जुटौं" भन्ने नारासहित साइकल दौड प्रतियोगिता सम्पन्न गरिएको थियो।

त्यस्तै स्थापना दिवसकै अवसरमा फागुन २८ गते बेलुका गाउँपालिका, वडा कार्यालय तथा स्वास्थ्य संस्थाहरूमा दीप प्रज्वलन गरिएको थियो।