मसुरीया, २५ फागुन - दाङको राप्ती गाउँपालिकाले क्षयरोग नियन्त्रणसम्बन्धी अर्धवार्षिक समीक्षा तथा कोहर्ट विश्लेषण कार्यक्रम सम्पन्न गरेको छ।

आइतबार सम्पन्न कार्यक्रममा गाउँपालिका अध्यक्ष प्रकाश विष्टले रोगीको पहिचान र उपचारमा विशेष ध्यान दिन स्वास्थ्यकर्मीहरूलाई निर्देशन दिनुभयो। उहाँले टोलटोलमा स्वास्थ्यकर्मी तथा महिला स्वास्थ्य स्वयंसेविकाहरूको सक्रिय सहभागितामा क्षयरोगीको खोजी, पहिचान र उपचारलाई तीव्र बनाउनु पर्नेमा जोड दिनुभयो।

अध्यक्ष विष्टले क्षयरोग एकदमै छिटो सर्ने भएकाले उपचार गर्नुभन्दा रोकथाममै प्राथमिकता दिनुपर्ने बताउनुभयो। यसका लागि प्रभावकारी स्वास्थ्य शिक्षा आवश्यक रहेको उल्लेख गर्दै उहाँले समुदायस्तरमै जनचेतना फैलाउनुपर्नेमा जोड दिनुभयो।

त्यस्तै उहाँले राप्ती गाउँपालिकामा "क्षयरोगमुक्त (टीबी-फ्री) कार्यक्रम" लागू गरिएको बताउँदै यस कार्यक्रमलाई प्रभावकारी बनाउन सबैको सहकार्य आवश्यक रहेको बताउनुभयो।

स्वास्थ्य शाखाका जनस्वास्थ्य निरीक्षक पदम प्रसाद पौडेलले गाउँपालिकामा क्षयरोगको अवस्था र रोग नियन्त्रणका लागि चालिएका कदमहरूको बारेमा प्रस्तुति दिनुभयो।

कोहर्ट विश्लेषण कार्यक्रममा राप्ती आधारभूत अस्पताल, कालापानीकी सिनियर अहेब सीता आचार्य र लालमटिया स्वास्थ्य चौकी, भालुबाङका सिनियर अहेब भुवन भण्डारीले क्षयरोगको वर्तमान अवस्थाको बारेमा जानकारी गराउनुभयो।

कार्यक्रममा राप्ती गाउँपालिकाका उपाध्यक्ष कमलापती चौधरी, स्वास्थ्य शाखा प्रमुख नारायण राउत, गाउँपालिकाका ९ वटै वडामा रहेका स्वास्थ्य संस्थाका स्वास्थ्यकर्मीहरू लगायतको उपस्थिति रहेको थियो।

कार्यक्रमको सहजीकरण पालिकाका जनस्वास्थ्य निरीक्षक पदम प्रसाद पौडेलले गर्नुभएको थियो।