भालुबाङ २२ फागुन- लुम्बिनी प्रदेश स्तरीय जग्गा एकीकरण सहजीकरण समितिको बैठक बिहीबार सम्पन्न भएको छ। बैठक प्रदेश सरकारका आर्थिक मामिला तथा योजना मन्त्री तथा सहजीकरण समितिका संयोजक धनेन्द्र कार्कीको अध्यक्षता एवं लुम्बिनी प्रदेश सभाका सभामुख तुलाराम घर्ती मगरको प्रमुख आतिथ्यतामा सम्पन्न भएको हो।

बैठकमा जग्गा एकीकरण कार्यलाई व्यवस्थित रूपमा सञ्चालन गर्ने विषयमा छलफल गरिएको थियो। साथै, स्थानीयबासीहरूले पेश गरेका मागहरूबारे छलफल गर्दै प्रदेश सरकारलाई आवश्यक सुझाव पेश गर्ने निर्णय गरिएको छ।

बैठकमा प्रदेशका विभिन्न सरकारी निकायका प्रतिनिधिहरू, स्थानीय तहका प्रमुखहरू तथा सरोकारवालाहरूको उपस्थिति रहेको थियो। सहभागीहरूले जग्गा एकीकरण प्रक्रियालाई पारदर्शी, प्रभावकारी र जनमुखी बनाउन आवश्यक नीति तथा रणनीति अवलम्बन गर्न सुझाव दिएका छन्।

कार्यक्रमका आर्थिक मामिला तथा योजना मन्त्री तथा सहजीकरण समितिका संयोजक धनेन्द्र कार्कीले जग्गा एकीकरण कार्यलाई सहज बनाउन प्रदेश सरकार प्रतिबद्ध रहेको उल्लेख गर्दै, सबै पक्षको सहकार्य आवश्यक हुने बताउनुभयो। सभामुख तुलाराम घर्ती मगरले स्थानीय तहबाट आएका माग तथा सुझावलाई सम्बोधन गर्दै व्यवस्थित विकासका लागि जग्गा एकीकरण महत्त्वपूर्ण रहेको धारणा व्यक्त गर्नुभयो ।