दाङ, १९ फागुन - लुम्बिनी प्रदेशका मुख्यमन्त्री चेतनारायण आचार्यले निजि क्षेत्रलाई लगानी गर्ने सहज वातावरण बनाउन तयार रहेको बताएका छन् ।

दाङको तुलसीपुर स्थित राप्ती लाइफ केयर हस्पिटल प्रालिको १८ औं बार्षिकोत्सव तथा भवन उद्घाटन कार्यक्रमलाई सोमबार सम्बोधन गर्दै मुख्यमन्त्री आचार्यले निजि क्षेत्रलाई लगानीमा उत्साहित हुने वातावरण तयार गर्ने बताए ।“ पाईभेट सेक्टरलाई पनि लगानी गर्ने सहज वातावरण बनाउन तयार छौं”,उनले भने “तपाईहरु लगानी गर्न उत्साहित भएर लाग्नुस् ।”

साथै निजि क्षेत्रले पनि राज्यले बनाएको नीति, नियम, मापदण्डलाई पालन गर्नुपर्ने बताए । त्यस अवसरमा तुलसीपुर उपमहानगरपालिकाका प्रमुख टिकाराम खड्काले शिक्षा, स्वास्थ्य क्षेत्रमा निजि क्षेत्रले खेलेको भूमिका उल्लेख्य रहेको बताए ।

निजि क्षेत्रको लगानीले पनि राज्यलाई सहयोग पु¥याएको उनको भनाई थियो । २७ करोड लगानी गरेर सञ्चालनमा आएको हस्पिटलले बार्षिक १७ करोेड ७३ लाख बार्षिक कारोबार गर्दै आएको छ । हाल उक्त हस्पिटल एकसय सैयाको छ ।

त्यति मात्रै होईन्, शैक्षिक कार्यक्रम पनि सञ्चालन गरिरहेको छ । प्रमाणपत्र तहमा नर्सिङ र सामान्य चिकित्साको कक्षा सञ्चालन गरिरहेको छ, भने आगामी बर्षमा ल्याब र फार्मेसीका कार्यक्रम सञ्चालन गर्ने गरि अनुमति ल्याइसकेको हस्पिटलका अध्यक्ष हरि रिजालले बताए ।

अस्पतालले जनरल मेडिसिन, हाडजोर्नी तथा नसा, प्रसुती तथा स्त्रीरोग, जनरल सर्जरी, नवजात तथा वालरोग, नाक, कान, घाँटी रोग, मानसिक तथा नशा रोग, रेडियोलोजिस्ट, एनेसथेसिया तथा कृटिकल केयर न्यूरो, फेजिसियनलगायतका बिशेषज्ञ सेवा प्रदान गरेको छ, भने आईसियु, एनआईसियु सेवा पनि प्रदान गरिरहेको छ । हस्पिटलले १० प्रतिशत शैया निःशुल्क उपलब्ध गराउँदै आएको छ ।

त्यस्तैगरी नर्सिङ र सामान्य चिकित्सा अध्ययनरत १० प्रतिशत विद्यार्थीहरुलाई निःशुल्क अध्यापन पनि गराउँदै आएको छ । प्रालिले हाल दुईसय ९ जनालाई रोजगारी समेत दिन सफल भएको छ । कार्यक्रममा जनप्रतिनिधि, राजनीतिक दलका प्रमुख तथा प्रतिनिधिहरुले मन्तब्य ब्यक्त गरेका थिए, भने विद्यार्थीहरुले संस्कृतिक प्रस्तुती राखेका थिए । कार्यक्रमको सहजीकरण निर्देशक जीवन भण्डारीले गरेका थिए ।