दाङ :  दाङको शान्तिनगर गाउँपालिका १ हारीचारका झुपलाल घर्ती शनिबार लक्ष्मी आधारभूत विद्यालय हारीचारमा निःशुल्क स्वास्थ्य शिविर हुन लागेको थाहा पाएपछि बिहानै विद्यालयमा आइपुगेका थिए । वृद्धावस्थामा विभिन्न रोगका कारण समस्या पाइरहेका उनले गाउँमा पहिलो पटक स्वास्थ्य शिविर हुन लागेको थाहा पाएपछि चेकजाँच गराउन आएका थिए । यो ठाउँ एकदमै विकट ठाउँका रुपमा पनि चिनिन्छ । राम्रो सडकको सुविधा नहुँदा यहाँका नागरिकहरू निकै दुख गरेर सामान्य उपचारको लागि पनि तुलसीपुर आउने गर्दछन् । यसरी गाउँमा विशेषज्ञ डाक्टरसहितको स्वास्थ्य शिविर हुँदा निकै खुशी लागेको उनले बताए । उनले भने,‘ यो ठाउँ निकै विकट ठाउँ रहेको छ । हामी उपचार गर्नको लागि तुलसीपुर जानु पर्ने बाध्यता छ । आज तुलसीपुरबाट ठूला डाक्टर आउने  कुरा थाहा पाएपछि बिहानै उपचार गर्न आएको हु ! ’

आफूलाई ठाउँको दुख्ने, चक्कर लाग्ने शरीर दुख्ने समस्या हुने गरेको समेत उनले बताए । घरमा डाक्टरहरू आएर यसरी सेवा पाउँदा धेरै खुशी लागेको उनको भनाइ छ ।  यस्तै सोही ठाउँकी सुशीला बिकले पनि गाउँमा पहिलो पटक स्वास्थ्य शिविर भएको भन्दै खुशी व्यक्त गरिन् । उनले पनि आफूलाई टाउको दुख्ने, हातखुट्टा दुख्ने लगायतको समस्या हुने गरेको भन्दै चेकजाँच गराउन आएको बताइन् ।  उनले भनिन्,‘  हामी जस्ता बिरामीहरूलाई यो शिविरले आज धेरै फाइदा गरेको छ । उपचार गर्न जानको लागि एक त आर्थिक हुँदैन । त्यसमा पनि सडकको अवस्था राम्रो छैन् । सामान्य उपचार गर्न तुलसीपुर बजार नै जानु पर्ने बाध्यता छ । आज निःशुल्क उपचार गर्न पाउँदा धेरै खुशी लागेको छ । ’

यस्तैगरी उनले गाउँ मै नि:शुल्क उपचार सेवा पाउँदा आफ्नो रोगको बारेमा पनि थाहा पाएको र पैसाको पनि बचत भएको बताइन् । ‘  यदि आज तुलसीपुर बजार उपचार गर्न गएको भए । २ / ४ हजार खर्च हुने थियो, होला । तर, यहाँ सबै निःशुल्क नै पाइएको छ । हामी जस्ता नागरिकहरूले यसले धेरै फाइदा पुगेको छ । अझै आगामी दिनहरूमा पनि यस्तै सेवा पाए राम्रो हुने थियो । ’ यस्तै अर्की स्थानीय नन्दकली बिकलाई पाठेघरको समस्या रहेको छ । उनले पनि बेला बेला उपचार गर्दै आइरहेको भन्दै गाउँ मै स्वास्थ्य शिविर  आएको बेला चेकजाँच गराउन  आएको बताइन् ।

उनले भनिन्,‘ अस्पतालमा पाइने एक दिने सेवा गाउँघरमा पहिलो पटक पाउँदा धेरै खुशी लागेको छ । यहाँका नागरिकहरूले यस्तो सेवा पाउनु भनेको निकै खुशीको कुरा हो । सामान्य उपचार पाउन समेत  तुलसीपुर जानु पर्ने अवस्थामा यो विकट ठाउँलाई सम्झेर आउनु नै हामीहरूको लागि ठूला कुरा हो ।’ हारीचारमा निःशुल्क स्वास्थ्य शिविरको आयोजना गर्नको लागि शान्तिनगर ५ कासीपुर घरभइ हाल तुलसीपुर बस्दै आएका विजय केसीले सहजकर्ताको भूमिका खेलेका थिए । उनले आफ्ना गाउँपालिकाको विकट क्षेत्रमा रहेको हारीचारका नागरिकहरूलाई स्वास्थ्य सेवा पु¥याउने उद्देश्यले यो शिविरको आयोजना गरिएको समेत बताए।

निःशुल्क स्वास्थ्य शिविरमा  २ सय बढि बिरामीले सेवा लिए

तुलसीपुरमा रहेको तानसेन पाल्पाली मेडिको फर्मको आयोजनामा चिनारी हस्पिटलको प्राविधिक सहयोगमा जनरल फिजिसियन, स्त्रीरोग, बालरोग र दन्तरोग विशेषज्ञ टोलीहरूको सहभागिता रहेको शिविरका २ सय बढि बिरामीहरूले सेवा पाएको मेडिको फर्मका सञ्चालक राजेन्द्र श्रेष्ठले बताए ।  उनका अनुसार शिविरमा सबैभन्दा धेरै पाठेघरसम्बन्धी बिरामीहरू फेला परेका थिए ।
त्यस्तैगरी कलेजोमा समस्या भएका, बच्चाहरूमा हड्डीको समस्या भएका लगायत अन्य रोगका बिरामीहरू फेला परेको भन्दै उनले केहि बिरामीहरूलाई थप उपचारको लागि बोलाएको समेत बताए । उहाँले भन्नु,‘ हामीले आज निःशुल्क रुपमा बिरामीहरुको स्वास्थ्य चेकजाँच गरेका छौँ । ठाउँ पनि एकदमै विकट ठाउँ नै रहेछ । हामीले थप उपचारमा बोलाएका बिरामीहरूलाई विशेष छुट दिएर थप उपचार गर्ने व्यवस्था मिलाएका छौँ । ’

विद्यार्थीहरुलाई व्याग सहयोग

लक्ष्मी आधारभूत विद्यालय  हारीचारका विद्यार्थीहरुलाई तानसेन पाल्पाली मेडिको फर्म र  तुलसीपुरमा रहेको नविल  बैंकले ब्याग सहयोग गरेको छ । निम्न आर्थिक भएका विद्यार्थीहरुले अध्ययन गर्ने विद्यालय रहेको हुँदा फर्मले २७ वटा र बैंकले ६० वटा ब्याग सहयोग गरेको फर्म सञ्चालक श्रेष्ठले बताए ।  यस्तै बैंकका शाखा प्रबन्धक सुधिर भण्डारीले बैंक वित्तिय संस्थाहरुले आफ्नो नाफालाई समाजप्रति उत्तरदायित्व हुनु पर्छ,  भन्ने उदेश्यकले विद्यालयका विद्यार्थीहरुलाई ब्याग वितरण गरिएको बताए । आफ्नो बैंकले शिक्षा, स्वास्थ्य क्षेत्रमा विशेषगरी ध्यान दिने गरेको भन्दै उनले बैंकले बालबालिकाहरुको लागि सानो सहयोग गरेको समेत बताए ।