दाङ,१७फागुन - दाङको तुलसीपुर बजारमा विद्युतका खाली तार थिए ।‘हाइटेन्सन्’ लाईन नै खाली हुँदा करेन्ट लाग्ने जोखिम थियो । त्यो जोखिम अब हट्ने भएको छ । नेपाल विद्युत प्राधिकरण वितरण केन्द्र तुलसीपुरले हाइटेन्सन लाईनका खाली तार हटाएर नयाँ तार राखेको छ, भने तारमा कभर पनि राखेको छ ।

साथै यस अघि ३० स्क्वायर मिटर तार रहेकोमा ति तार हटाएर एकसय स्क्वायर मिटर तार राखिएको छ । यस अघि तार चुडिने, क्षमता नधान्नेजस्ता सस्या पनि अन्त्य हुने वितरण केन्द्र तुलसीपुरका प्रमुख शिव नारायण गोशलीले बताउनुभयो ।

उहाँका अनुसार तुलसीपुर बजार क्षेत्रलाई सुरक्षित बनाउन यस्तो कार्य गरिएको हो । बजार क्षेत्र भित्रको ४५ किलोमिटर तारलाई त्यसरी कभर राख्नुकासाथै एक सय स्क्वायर फिट बनाईएको हो । एक करोड रुपैँया लागतमा ति तारहरु फेरिएको उहाँको भनाई छ । तुलसीपुरमा विद्युतका ५२ हजार दुईसय ९० ग्रहाक रहेका छन् ।

शान्तिनगर गाउँपालिका वडा नं.५  रगैँचामा भवन बन्दै
दाङको शान्तिनगर गाउँपालिका वडा नं.५ रगैचामा विद्युतको भवन निर्माण प्रक्रिया अघि बढेको छ । जहाँ ‘नो लाइट’ सेवाको कार्यालय छ । त्यसकालागि स्थानीय गिरीराज बस्नेतले जग्गा दिएपछि भवन नै बन्न लागेको हो । यस अघि त्यहाँ भाडाबाट उक्त कार्यालय सञ्चालनमा थियो ।

शान्तिनगर, दंगीशरण गाउँपालिकालगायतलाई सेवा दिन त्यहाँ एक जना कर्मचारीसहित उक्त सेवा सुरु गरिएको हो ।

नेपाल विद्युत प्राधिकरण वितरण केन्द्र तुलसीपुरका प्रमुख शिव नारायण गोशलीका अनुसार केही दिन अघि मात्रै टेण्डर आह्वान भएको उहाँले बताउनुभयो । भवन निर्माण भएपछि सेवा प्रवाहमा थप सहजता आउने उहाँको भनाई छ । ४३ लाखको टेन्डर भएको हो ।