दाङ  - दाङको घोराही उपमहानगरपालिका–१४, झिँगौरामा जारी छैठौँ कृषि, पर्यटन तथा व्यापार महोत्सव–२०८१ अन्तर्गत आज चर्चित गायिका टीका प्रसाईंले प्रस्तुति रहने  महोत्सव आयोजक मूल समितिका संयोजक वसन्त जोशीले जानकारी दिनु भयो ।

टीका प्रसाईंका ‘नाइँ मलाई थाहा छैन’, ‘माया लुकी लुकी’, ‘कर्के नजर’, ‘तिमी भन्छौ भने’ लगायतका गीतहरू नेपाली संगीतप्रेमीहरूका लागि लोकप्रिय छन्।

महोत्सवको १५ औँ दिन शुक्रबार गायिका टीका प्रसाईंसँगै विष्णु खत्री, कला लम्साल, सन्दीप न्यौपाने, यादवनाथ योगी, नारायणी खत्री, दिपा बुढा, शोभा त्रिपाठी र बिमल मगरले पनि आफ्नो प्रस्तुति दिनेछन्। महोत्सव आयोजक मूल समितिका सहसंयोजक महेन्द्र बुढाथोकीका अनुसार यी कलाकारहरूको प्रस्तुति महोत्सवमा आज मुख्य आकर्षण बन्ने अनुमान गरिएको छ।

    प्रवेश शुल्क र विशेष छुट
 महोत्सव अवलोकन गर्नका लागि प्रवेश शुल्क प्रतिव्यक्ति १०० रुपैयाँ तोकिएको छ। विद्यार्थीहरूका लागि परिचयपत्रको आधारमा ८० रुपैयाँ मात्र लाग्नेछ भने अशक्त, अपाङ्ग तथा ज्येष्ठ नागरिकहरूलाई निःशुल्क प्रवेशको व्यवस्था गरिएको छ। टिकट व्यवस्थापन उपसमितिका संयोजक मधाव खनालका अनुसार महोत्सवलाई सर्वसाधारणमैत्री बनाउन विशेष छुटको व्यवस्था गरिएको बताउनु भयो।

    व्यापार, पर्यटन र कृषि प्रवर्द्धनको लक्ष्य
कृषि, पर्यटन तथा व्यवसाय प्रवर्द्धन गर्ने उद्देश्यले आयोजना गरिएको महोत्सवमा ४०० भन्दा बढी स्टलहरू रहेका छन्। महोत्सव अवधिभर करिब २ लाख दर्शकहरूले अवलोकन गर्ने अनुमान गरिएको छ भने २० करोड रुपैयाँ बराबरको आर्थिक कारोबार हुने लक्ष्य राखिएको छ।
 

उद्योग, व्यापार, कृषि तथा पर्यटन प्रवर्द्धन गर्दै आत्मनिर्भर अर्थतन्त्र निर्माण गर्ने उद्देश्यसहित आयोजना गरिएको महोत्सव फागुन १८ गतेसम्म सञ्चालन हुनेछ।