कमिरेचौर १५ फागुन - दाङको बंगलाचुली गाउँपालिका ३ मा अवस्थित माध्यमिक विद्यालय भेडाबारी मुलाबारीको ४६ ओै वार्षिकोत्सब सम्पन्न भएको छ । विद्यालय व्यवस्थापन समितिका अध्यक्ष श्रीवहादुर रानाको अध्यक्षता तथा बंगलाचुली गाउँपालिका अध्यक्ष तुल्सिराम पुनको प्रमुख आतिथ्यतामा वार्षिकोत्सब समारोह सम्पन्न भएको हो ।

वार्षिकोत्सब समारोहलाई सम्बोधन गर्दै बंगलाचुली गाउँपालिका अध्यक्ष तुल्सिराम पुनले बंगलाचुली गाउँपालिकामा शैक्षिक सुधार गर्न जनशक्ति व्यवस्थापनमा गाउँपालिका प्रतिवद्ध रहेको बताउनुभयो । उहाँले गाउँपालिकाले सबैभन्दा धेरै बजेट शिक्षा क्षेत्रमा हालेको पनि बताउनुभएको थियो । साथै उहाँले शैक्षिक सुधार गर्न विशेष गरि शिक्षक र अभिभावक एक हुन जरुरी रहेको समेत बताउनुभयो । कार्यक्रमका प्रमुख अतिथि समेत रहनुभएका अध्यक्ष पुनले अहिलेको युग सुचना र प्रविधिको युग भएपनि मोबाइल फोनमा विद्यार्थीले सकारात्मक भन्दा नकारात्मक कुराहरू धेरै हेर्ने गरेको भन्दै सहि सदुपयोग गर्नुपर्ने बताउनुभएको थियो ।

यस्तैगरी कार्यक्रममा बोल्दै बंगलाचुली गाउँपालिका उपाध्यक्ष भक्त बहादुर जिसिले शिक्षकहरु एक भइ शैक्षिक सुधार गर्न सकिने भएपनि भौतिक संरचना भवन प्रशस्त भएपनि विद्यार्थीको संख्या घट्दै गइरहेको बताउनुभयो ।

कार्यक्रममा बंगलाचुली गाउँपालिका वडा नम्बर ३ का वडा अध्यक्ष तथा गाउँपालिका प्रवक्ता शोभाराज विश्वकर्मा, शिक्षा शाखा प्रमुख ओम प्रकाश केसी, सामाजिक विकास समितिका संयोजक गणेश विश्वकर्मा लगायतले मन्तव्य राख्नुभएको थियो ।

वार्षिकोत्सब समारोहमा विभिन्न विद्यालयका प्रमुख तथा प्रतिनिधि, विभिन्न संघ संस्थाका प्रमुख तथा प्रतिनिधि, समाज सेवि लगायतको सहभागीचा रहेको थियो । वार्षिकोत्सबको अवसरमा ५३ जना पुर्व शिक्षकहरुलाई सम्मान गरिएको विद्यालयका शिक्षक शशी शर्माले जानकारी दिनुभयो।

वार्षिकोत्सब समारोहमा विद्यार्थीले बनाएका विभिन्न शैक्षिक सामाग्री तथा विभिन्न नृत्य प्रस्तुत गरिएको थियो ।

विद्यालयको वार्षिक प्रतिवेदन विद्यालयका प्रधानाध्यापक खगराज लम्सालले प्रस्तुत गर्नुभएको थियो । विद्यालयका सहायक प्रधानाध्यापक दिमान सिंह घर्तीको स्वागत मन्तव्यबाट सुरु भएको कार्यक्रमको सहजिकरण शिक्षक प्रकाश खनालले गर्नुभएको थियोे ।