गढवा, १३ फागुन - वन, प्राकृतिक स्रोत साधन एव सम्पदा संरक्षणको क्षेत्रमा काम गर्दै आएको वन तथा वातावरण संरक्षण समन्वय समिति गढवाको १६ औँ वार्षिक साधारण सभा सोमबार गढवा उद्योग बाणिज्य संघको सभाहलमा सम्पन्न भएको छ।

वन तथा वातावरण संरक्षण समन्वय समितिका अध्यक्ष पुष्पा यादवको अध्यक्षता तथा भू- परिधि कार्यक्रम (ताल)का प्रवन्धक राम किशोर यादवको प्रमुख आतिथ्य तथा राजपुर गाउँपालिका वडा नम्बर २ का वडाध्यक्ष ओम प्रकाश यादवको विशिष्ट आतिथ्यमा सम्पन्न भएको हो।

कार्यक्रममा बोल्दै प्रमुख अतिथि तथा भू- परिधि कार्यक्रम तालका कार्यक्रम प्रवन्धक राम किशोर यादवले वन सकिए जिवनको कल्पना गर्न नसकिने भएकाले वन संरक्षणमा सबैको साझा प्रयास आवश्यक रहेको बताउनुभयो। संस्थाका अध्यक्ष पुष्पा यादवले प्रस्तुत गर्नु भएको आगामी कार्ययोजनाहरुमा तालले सहयोग गर्ने प्रतिबद्धता समेत व्यक्त गर्नुभयो। अमेरिकी सहयोग रोकिदा तालका कार्यक्रमहरु समेत प्रभावित भएको बताउनुभयो। वन जोगाउने कि मानव जोगाउने जस्ता प्रश्न आफुले खेप्दै आएको बताउदै प्रवन्धक यादवले वन र वातावरणको संरक्षण नगरे मानवमाथी ठुलो असर पुग्ने जस्को असर जलबायु परिवर्तनबाट सुरु भएको बताउनुभयो।

साधारण सभामा संस्थागत प्रगति तथा आगामी कार्ययोजना प्रतिबेदन प्रस्तुत गर्दै संस्थाकी अध्यक्ष पुष्पा यादवले २०६५ सालमा २३ वटा सामुदायिक वनहरु संगको समन्वयमा तराई भू परिधि कार्यक्रम धनगढीको प्राविधिक सहयोगमा दर्ता गरी सञ्चालन गरेको बताउनु भयो। हाल वन तथा वातावरण संरक्षण समन्वय समिति गढवामा ६५ वटा सामुदायिक वनले सदस्यीता लिएता पनि ४० जनाले नविकरण गरेको प्रतिबेदनमा प्रस्तुत गर्नुभएको थियो। २०६५/०६६ देखी तराई भू परिधि कार्यक्रम धनगढीसंग सहकार्य गर्ने अवसर पाएर सामुदायिक वन उपभोक्ता समूहहरुको हस हित अधिकार र आवश्यकता संग मेल खाने भएकाले तराई भू परिधि कार्यक्रम लाई वन वातावरण संरक्षण समन्वय समितिले एउटा बलियो भरपर्दो सहयोगी साझेदार भएको प्रतिबेदनमा प्रस्तुत गर्नुभएको थियो।

कार्यक्रममा आर्थिक प्रतिबेदन प्रस्तुत गर्दै संस्थाका कोषाध्यक्ष दुखहरण यादवले आर्थिक वर्ष २०८१/०८१ को नगद तथा बैंक मौज्दातमा २७ हजार ५ सय २३ रुपैयाँ ३१ पैसा रहेको प्रस्तुत गर्नु भएको थियो भने भुक्तानी दिन बाँकी विवरणमा ५ लाख ६ सय १ रुपैयाँ १३ पैसा बाकीँ रहेको प्रतिबेदनमा उल्लेख गरिएको छ।

कार्यक्रममा राजपुर गाउँपालिका वडा नम्बर २ का वडाध्यक्ष ओम प्रकाश यादव, वन तथा वातावरण संरक्षण समन्वय समिति गढवाका संस्थापक अध्यक्ष उमाकान्त पन्त,चुरे क्षेत्र बचत तथा ऋण सहकारी संस्था लिमिटेड गढवाका अध्यक्ष हेमन्त चौधरी, गढवा उद्याेग बाणिज्य संघका अध्यक्ष ओम प्रकाश बसेल,संस्थाका सल्लाहकार लाल बहादुर भण्डारी, देउखुरी सामुदायिक पुस्तकालय तथा स्रोत केन्द्र गढवाकी अध्यक्ष ओभा पाठक, , संस्थापक उपाध्यक्ष शकुन्तला डिसी लगायतकाले शुभकामना मन्तव्य व्यक्त गर्नुभएको थियो।

वन तथा वातावरण संरक्षण समन्वय समितिका उपाध्यक्ष रमेश कुमार न्योपानेको स्वागत मन्तव्य बाट सुरु भएको कार्यक्रमको सहजिकरण संस्थाका कोषाध्यक्ष दुखहरण यादवले गर्नु भएको थियो।