दाङ - दाङको तुलसीपुर महोत्सव स्थल भित्रका होटेलहरुको अनुगमन गरिएको छ ।

जिल्ला प्रशासन कार्यालय दाङ, खाद्य प्रबिधि तथा गुण नियन्त्रण डिभिजन कार्यालय दाङ र तुलसीपुर उपमहानगरपालिकाकाको टोलीले संयुक्त रुपमा अनुगमन गरेको हो । अनुगमनका क्रममा महोत्सवमा रंग हालेका खानेकुरा भेटिएका थिए ।

त्यस्ता खानेकुरालाई नष्ट गरिएको थियो । यस अघि पनि महोत्सवका होटेलहरुको अनुगमन गरि सुधार गर्न निर्देशन दिइएको थियो । त्यसमा होटेलहरुले केही सुधार गरेको समेत भेटिएको थियो ।

त्यस्तैगरी तुलसीपुर बसपार्क क्षेत्रका ९ वटा होटेल तथा किराना पसलहरुमा समेत अनुगमन गरिएको थियो । अनुगमनका क्रममा जेरीमा रंग हालेको, किचन फोहर भएको, बासी खानेकुरा राखेको, पसल दर्ता नगरेको जस्ता समस्या देखिएका थिए । यस अघि पनि अनुगमन गरिएकाले केही सुधार भएपनि अझै सुधार आबश्यक रहेको खाद्य प्रबिधि तथा गुण नियन्त्रण डिभिजन कार्यालय दाङका प्रमुख पदम बरालले बताउनुभयाे ।

उनले अनुगमनलाई निरन्तर अगाडी बढाएकाले पनि विगतजस्तो समस्या नरहेको समेत बताए । अनुगमनमा जिल्ला प्रशासन कार्यालय दाङका प्रशासकीय अधिकृत विजय गौतम, खाद्य प्रबिधि तथा गुण नियन्त्रण डिभिजन कार्यालय दाङका प्रमुख पदम बराल, निरीक्षण अधिकृत विवेक कुमार सुवेदी, तुलसीपुर उपमहानगरपालिकाबाट खेमकान्त पाण्डे, इलाका प्रहरी कार्यालय तुलसीपुरका प्रहरी हवलदार खुसीराम थारु, पत्रकार दीपक बोहरालगायतको टोलीले अनुगमन गरेको हो ।  साभार - लाइभदाङ