गढवा - स्वाभिमान लघुवित्त वित्तीय संस्था लिमिटेडद्वारा गढवा गाउँपालिका वडा नम्बर ६ गढवा गाउँपालिकाको सभाहलमा एकदिने व्यवसायिक बाख्रापालन तालिम सम्पन्न भएको छ ।  

रुपन्देही जिल्लाको तिलोत्तमा ५ मणिग्राममा केन्द्रीय कार्यालय रहेको स्वाभिमान लघुवित्त वित्तीय संस्था लिमिटेड, शाखा कार्यालय राजपुर गाउँपालिकाको बेलामा रहेको लघुवित्तले बाख्रा पालक कृषकहरुलाई व्यवसायिक बाख्रापालन तालिम दिएको हो।

तालिमको समापन कार्यक्रममा बोल्दै प्रमुख अतिथि तथा गढवा गाउँपालिका अध्यक्ष यमनारायण शर्मा पोख्रेलले बचत तथा ऋणको कारोबार संगसगै समुहका कृषकहरुलाई व्यवसायिक तालिम दिएको भन्दै धन्यवाद ज्ञापन गर्नुभएको थियो। गढवा र राजपुर गाउँपालिका पशुपालनको लागि राम्रो सम्भावना रहेकोले बाख्रा पालन व्यवसाय बाट आत्मनिर्भर बन्न सकिने बताउनुभयो। परम्परागत रुपमा पाल्दै आएको बाख्रा पालनालाई आधुनिकरुपमा परिमार्जन गरी व्यवसायीक रुपमा बाख्रा पालन गरे महिला दिदिबहिनीहरु आत्मनिर्भर बन्न सकिने बताउनुभयो। नेपालमा हालको अवस्थामा रोजगारको अवस्था सिर्जना गर्न सम्भव नरहेकोले पशुपालनको क्षेत्रमा राम्रो संभावना रहेकोले एक्लै वा सामुहिक रुपमा बाख्रा पालन व्यवसायीक रुपमा लाग्न अनुरोध समेत गर्नु भयो। गढवा गाउँपालिकाले भिटा परियोजना मार्फत कृषि तथा पशु विकासमा आधारित रहेर ठुलो कार्यक्रम अघि बढाएको जानकारी दिदै बाख्राको नश्लसुधारका लागि उन्नत जातको बोका, घाँस, खोर सुधार कार्यक्रम लगायतका थुप्रै महत्वपूर्ण कार्यक्रम अघि बढाएको बताउनुभयो।

२ दिनसम्म गढवा गाउँपालिकाको सभाहलमा सञ्चालन भएको तालिममा ४० जनाको सहभागिता जना कृषकहरुको सहभागिता रहेको थियो । बाख्रा पालक कृषकहरुलाई व्यवसायीक बनाउनका लागि तालिमको आयोजना गरिएको संस्थाका शाखा कार्यालय बेलाका प्रमुख दिपेन्द्र राज चौधरीले जानकारी दिनुभयो। परम्परागत प्रणालीबाट गरिदै आएको बाख्रापालन व्यवसायलाई प्रविधिसँग जोडेर व्यवसायीक बनाई त्यसबाट किसानहरुलाई रोजगारमुखी बनाउन तालिमले महत्वपुर्ण भुमिका निर्वाह गर्ने प्रमुख चौधरीले बताउनुभयो।

लघु उद्यमीको आर्थिक अवस्था सुधारका लागि एअ परिवार एक उद्यम बनाउने उद्देश्य अनुसार संस्थाले बिगत ९ बर्षदेखि निरन्तर लघुवित्त सेवा प्रदान गर्दै आएको संस्थाका अनुगमन अधिकृत राम नरेश चौधरीले जानकारी दिनुभयो । संस्थाले हाल ७ जिल्लाको ३६ वटा शाखा स्थापना गरी सेवा प्रदान गर्दै आएको बताउदै प्रमुख चौधरीले फागुन मसान्तसम्म ३४ हजार घरपरिवार सम्म  सेवा बिस्तार गरेको बताउनु भयो। २०८१ फागुन मसान्तसम्म लघुवित्तले २ अरब ७० करोड कर्जा प्रवाह गरेको छ भने ग्राहक सदस्यहरुको करिब ८० करोड रुपैयाँ बचत परिचालन गरेको जानकारी दिनुभयो।
 दुईदिने तालिममा बाख्राको परिचय देखी स्थानीय र उन्नत जातमा भिन्नता, नस्लसुधारको फाईदा, बाखाको खानपान र बास स्थान बारे जानकारी, लाग्ने रोग तथा उपचारको बारेमा जानकारी, खोपको बारेमा जानकारी, पशु बिमाको बारेमा जानकारी, स्थानीय बाख्रा पालनको महत्व, संरक्षण तथा विकाश, बजारीकरण बारे लगायतका थुप्रै बिषय बस्तुको बारेमा जानकारी दिईएको अनुगमन अधिकृत राम नरेश चौधरीले जानकारी दिनुभयो।

दुईदिने व्यवसायिक बाख्रापालन तालिमको प्रशिक्षकहरुमा गढवा गाउँपालिका पशुपंक्षी तथा मत्स्य विकास शाखाका अधिकृत द्वय अन्नतराज रेग्मी, खेम चौधरी, त्यसैगरी पशु बिकास अधिकृत डा. भिमार्जुन थापा,पशु चिकित्सक सुनिल चौधरी रहनु भएको थियो।

कार्यक्रममा संस्थाको अनुगमन कार्यालय खजुरा बांकेका अनुगमन अधिकृत राम नरेश चौधरी, मसुरिया शाखाका प्रमुख अमृता केसी खड्का, लगायतकको सहभागिता रहेको थियो।

तालिममा बोल्ने बक्ताहरुले दुईदिने व्यवसायिक बाख्रापालन तालिमले धेरै ज्ञान सिप र काम गर्ने जोस जाँगर प्रदान गरेको बताएका थिए। तालिम नलिदा धेरै विषयबस्तुमा शंखा उपशंका भएकाले व्यवसायिक रुपमा बाख्रा पालन व्यवसाय तर्फ आफुहरु बढेको बताउदै अब तालिमबाट व्यवसायीक रुपमै बाख्रापालन गरेर आत्मनिर्भर बन्न सक्ने हिम्मत जुटेको सहभागी कृषकहरुले बताएका थिए।