दाङ - दाङकाे तुलसीपुरमा कार र मोटरसाईकल एकआपसमा ठोक्किदा दुईजना घाइते भएका छन। मंगलबार दिउसो करिब सवा ३ बजेको समयमा तुलसीपुर वडा नम्बर ६ ज्ञानज्योति बोर्डिङ स्कुल नजिकै दुर्घटना भएको थियो ।

घोराही रोडबाट ६ नम्बर वडा कार्यालयतर्फ जाँदै गरेको बा प्र ०१–०२६ च ४२१६ नम्बरको गाडी र बिपरित दिशाबाट आउँदै गरेको रा ३ प ६८०० नम्बरको मोटरसाइकल एक आपसमा ठोक्किदा तुलसीपुर ९ बस्ने बर्ष २४ को संजय के.सी घाइते भएका हुन् ।

घाइते केसीलाई राप्ती प्रादेशिक अस्पताल तुलसीपुरमा सामान्य उपचार पछि थप उपचारको लागि लखनउ लगिएको इलाका प्रहरी कार्यालय तुलसीपुरका प्रहरी निरिक्षक सुर्य बहादुर रानाले जानकारी दिनुभयाे।

त्यस्तैगरी मोटरसाइकलमा पछाडी सवार तुलसीपुर ७ बस्ने बर्ष २८ का सुदिप नेपालीलाई दुबै हात, खुट्टा र टाउकोमा सामान्य चोट लागेको र सिटी अस्पतालमा सामान्य उपचार पछि डिस्चार्ज गरिएको छ ।

प्रहरी निरीक्षक रानाका अनुसार केसीको दुबै हात खुट्टा, टाउको र मुखमा चोट लागेको छ । दुबै सवारी साधनलाई प्रहरीले नियन्त्रणमा लिएको छ ।