दोस्रो कृषि, पर्यटन, साँस्कृतिक तथा व्यापारिक तुलसीपुर महोत्सव २०८१ अन्तर्गत आज चर्चित कलाकारहरूको आकर्षक प्रस्तुति रहने भएको छ। आजको विशेष प्रस्तुतिमा गायक पुष्कल शर्मा, गायिका सिम्रन परियार, गायक एम.टी. महर लगायत चर्चित कलाकारहरूको धमाकेदार प्रस्तुति रहनेछ। साथै, स्थानीय कलाकारहरूको समेत सहभागिता रहने साँस्कृतिक संयोजक सन्तोष खड्काले जानकारी दिनुभयो।

संयोजक खड्काका अनुसार, आजका लागि टिकटहरू हिजो नै बिक्री भइसकेका छन्। सार्वजनिक बिदा परेको कारण महोत्सवमा दर्शकहरूको उपस्थिति अत्यधिक रहने अनुमान गरिएको छ, महोत्सव सञ्चालन समितिका अध्यक्ष ऋषिराज भण्डारीले बताउनुभयो ।

फाल्गुन १ गतेदेखि सुरु भएको तुलसीपुर महोत्सव १६ गतेसम्म सञ्चालन हुनेछ। स्वरोजगार, आत्मनिर्भरता हाम्रो आधार, शहरदेखि गाउँसम्म व्यापार विस्तारू भन्ने नाराका साथ सञ्चालन गरिएको महोत्सवले कृषि, पर्यटन, व्यापार र संस्कृतिको प्रवर्द्धन गर्दै स्थानीय उत्पादनलाई बजारीकरण गर्ने, स्वदेशी व्यापारलाई प्रवर्द्धन गर्ने तथा स्वरोजगारका अवसरहरू सिर्जना गर्ने लक्ष्य राखेको छ। तुलसीपुर चेम्बर अफ कमर्सको आयोजना तथा तुलसीपुर उपमहानगरपालिकाको संरक्षकत्वमा महोत्सव जारी रहेको छ।