कमिरेचाैर -  दाङको बंगलाचुली गाउँपालिकामा रहेको बङ्गलाचुली अस्पताललाई विभिन्न मेडिकल उपकरणहरू सहयोग गर्न सहयोगी दाताहरूले अस्पतालको अनुगमन गरेका छन्। बंगलाचुली गाउँपालिकाद्वारा सञ्चालित बंगलाचुली अस्पताललाई डिजिटल एक्सरे मेसिन ,ल्याब सामग्रीहरू ,डेलिभरी सामग्रीहरु ,लगायतका उपकरणहरु सहयोग गर्नको लागि सहयोगदाताहरुले अस्पतालको अनुगमन गरेका हुन् ।

दिगो विकासका लागि सहकार्य नेपाल र अमेरिकन प्रोजेक्ट केयरको साझेदारीमा बंगलाचुली अस्पताललाई मेडिकल उपकरणहरू सहयोग गर्न सो संस्थाका प्रतिनिधिहरूले अस्पतालका अनुगमन गरेका हुन्।  अस्पताललाई उपकरणहरु सहयोग गर्नका लागि बंगलाचुली गाउँपालिकाका अध्यक्ष एवं अस्पताल व्यवस्थापन समितिका अध्यक्ष तुलसीराम पुन मगरले पहल गर्नुभएको हाे । अध्यक्ष पुनकाे सक्रियतामा त्यी संस्थाका प्रतिनिधिहरुले बंगलाचुली गाउँपालिकामा अवस्थित बंगलाचुली अस्पतालको अवलोकन गरेका हुन् ।

 सो अवसरमा बङ्गलाचुली गाउँपालिकाका अध्यक्ष एवं अस्पताल व्यवस्थापन समितिका अध्यक्ष तुलसीराम पुनमगर ,अस्पताल व्यवस्थापन समितिका उपाध्यक्ष शोभाराज विश्वकर्मा, अमेरिकन प्रोजेक्ट केयरका डाक्टर ,  बंगलाचुली गाउँपालिका स्वास्थ्य शाखा प्रमुख नेव बहादुर केसी, बंगलाचुली अस्पतालका मेडिकल अधिकृत प्रकाश ओली ,अस्पतालका जनस्वास्थ्य निरिक्षक शुवास चन्द सेर्पाईली, अस्पतालका विभिन्न पदमा कार्यरत कर्मचारीहरू लगायतको सहभागिता रहेको थियो।
सहयोगी दाताहरूले बंगलाचुली अस्पताललाई छिट्टै मेडिकल उपकरणहरू सहयोग गर्ने प्रतिबद्धता व्यक्त गरेका छन्। सो अवसरमा बोल्दै गाउँपालिका अध्यक्ष तुल्सीराम पुन मगरले सहयोगी दाताहरूबाट प्राप्त हुने मेडिकल उपकरणहरूले अस्पतालको सेवा प्रवाहलाई थप व्यवस्थित र चुस्त पार्न सहयोग पुग्ने बताउनुभयो ।