५ फागुन, दाङ - नेकपा एमालेका अध्यक्ष तथा नेपाल सरकारका प्रधानमन्त्री केपी शर्मा ओलीले घोराही – तुलसीपुर बाटोको स्तरोन्नतिको कार्य तुरुन्त प्रारम्भ हुने बताउनुभएको छ । नेकपा एमाले दाङले सोमबार घोराहीस्थित सहिद मञ्चमा आयोजना गरेको आमसभालाई सम्बोधन गर्दै प्रधानमन्त्री ओलीले घोराही-तुलसीपुरको बाटो चौडा गर्ने कार्य एउटा लामो समयको  सपना भएको बताउनुभएको हो ।

कार्यक्रमका प्रमुख अतिथि समेत रहनुभएका प्रधानमन्त्री केपी शर्मा ओलीले अब घोराही- तुलसीपुर बाटोको विस्तार कार्य, अपग्रेट गर्ने कार्य र स्तरोन्नतिको कार्य तुरुन्त प्रारम्भ हुने बताउनुभयो । उहाँले दाङ एउटा जागरण, आन्दोलनकारी, सचेत र सिर्जनशील जनप्रतिनिधि भएको जिल्ला मानिने समेत बताउनुभयो ।

दाङबासीको एउटा लामो समयको सपना एयरपोर्ट भएको कुरामा जोडदिँदै प्रधानमन्त्री ओलीले यसपल्ट एयरपोर्टका लागि बजेट नै नभएको हुँदा ठूलो रकम कतैबाट लिएर एयरपोर्ट बनाउन नसकिने बताउनुभयो । तर, उहाँले तुलसीपुरमा रहेको टरिगाउँ एयरपोर्ट बनाउनका लागि आगामी बजेटमा एयरपोर्टसम्बन्धी निर्माण कार्यका लागि बजेट व्यवस्था गरिने र कामको प्रक्रिया अगाडि बढाइने बताउनुभयो ।

देउखुरी र दाङभ्यालीलाई सुरुङमार्फत जोड्ने र सुरुङमार्ग यो वर्ष तत्काल सम्भव नभएपनि तर मेरो योजनामा यहाँ सुरुङ बनाउने सोच छ, त्यो म कुनै समय कार्यान्वयन गर्छु उहाँले भन्नुभयो । दाङमा शंकर पोख्रेललाई चुनावमा हराएर तपाइहरुले ठूलो गल्ती गरेको र त्यतिबेला यतिको सकृयता देखाएको भए देशलाई अगाडि बढाउन अलिकत सजिलो हुने उहाँको भनाइ थियो ।