५ फागुन, दाङ - प्रधानमन्त्री तथा नेकपा एमालेका अध्यक्ष केपी शर्मा वली आज दाङ आउँदै हुनुहुन्छ । नेकपा एमाले जिल्ला कमिटी दाङले घोराहीमा राखेको जनसभालाई सम्बोधन गर्न ओली दाङ आउन लाग्नुभएको हो ।

प्रधानमन्त्री एवं एमाले अध्यक्ष केपी शर्मा ओलीले सम्बोधन गर्ने सभाको तयारी पूरा भएको नेकपा (एमाले) दाङले जनाएको छ । प्रधानमन्त्रीले सम्बोधन गर्ने सभामा जिल्लाका एक सय वटै वडाबाट सहभागिता रहने एमाले दाङका अध्यक्ष शिवकुमार आचार्यले जानकारी दिनुभयो । सभाको अघिल्लो दिन आइतबार नेकपा एमालेका महासचिव शंकर पोख्रेल दाङ आइसक्नुभएको छ । प्रधानमन्त्री ओली भने आज सोमबार नै दाङ आउने कार्यक्रम तय भएको एमाले दाङले जनाएको छ । एमाले दाङले ५० हजार भन्दा बढीको जनसभालाई प्रधानमन्त्री ओलीले सम्बोधन गर्ने कार्यक्रम तय भएको जनाएको छ । घोराहीको जनसभालाई सम्बोधन गर्नुअघि आजै प्रधानमन्त्रीले लुम्बिनीको प्रदेशसभालाई पनि सम्बोधन गर्ने कार्यक्रम तय भएको छ ।