मसुरीया, ४ फागुन - दाङको राप्ती गाउँपालिकाले सामुदायिक विद्यालयहरूको शैक्षिक गुणस्तर सुधारका लागि अनुगमनलाई तीव्रता दिएको छ।

यसै क्रममा आइतबार राप्ती गाउँपालिका–२ स्थित आदर्श नमुना माध्यमिक विद्यालय लालमटियाको अनुगमन गरिएको छ।
राप्ती गाउँपालिकाका प्रवक्ता तथा वडा नम्बर २ का अध्यक्ष पहलवान चौधरी, शिक्षा समिति सदस्य रणबहादुर पुजाली, शिक्षा, युवा तथा खेलकुद शाखा प्रमुख विश्वास विक, आर्थिक प्रशासन शाखाका प्रमुख रेशमराज अधिकारी लगायतको टाेलीले विद्यालयकाे अनुगमन गर्नुभएको हाे।

अनुगमनका क्रममा विद्यार्थीहरूसँग अन्तरक्रिया गर्दै पठनपाठनमा सुधार गर्न आवश्यक सुझाव दिइएको थियो।

शिक्षकहरूको उपस्थिति व्यवस्थापन प्रभावकारी बनाउन विद्यालयमा लागू गरिएको एकीकृत हाजिरी व्यवस्थापन प्रणालीको समेत जाँच गरिएको शिक्षा, युवा तथा खेलकुद शाखा प्रमुख विश्वास विकले जानकारी दिनुभयो ।

हाजिरी व्यवस्थापन प्रणालीमा कम उपस्थित देखिएका शिक्षकहरुलाई तत्काल स्पस्टिकरण साेधिने अनुगमन टाेलीले बताएको छ।

शाखा प्रमुख विकका अनुसार एकैपटक धेरै शिक्षक बिदामा बस्दा पठनपाठन प्रभावित हुने भएकाले यस्तो अवस्थालाई नियन्त्रण गर्न निर्देशन दिइएको छ।

यसअघि गरिएको मूल्यांकनका आधारमा कक्षा १० का केही विषयमा विद्यार्थीहरूको सिकाइ कमजोर देखिएको भन्दै अनुगमन टोलीले त्यसको तत्काल सुधार गर्न विद्यालय प्रशासनलाई निर्देशन दिएको छ।

साथै, विद्यालयमा लेखा प्रणाली व्यवस्थित गर्नुपर्ने, अचल सम्पत्तिको अभिलेखिकरण व्यवस्थित गर्नुपर्ने लगायतका सुझाव प्रदान गरेकाे छ।

अनुगमन टोलीले दृष्टिविहीन विद्यार्थीहरू अध्ययनरत विद्यालयको पनि स्थलगत अवलोकन गरेको छ। टोलीका अनुसार, आगामी शैक्षिक सत्रदेखि दृष्टिविहीन विद्यार्थीहरूलाई आदर्श नमुना माध्यमिक विद्यालयमै स्थानान्तरण गर्ने योजना रहेको छ।

राप्ती गाउँपालिकाले शैक्षिक उपलब्धि वृद्धि गर्ने उद्देश्यले सामुदायिक विद्यालयहरूको नियमित अनुगमनलाई निरन्तरता दिई रहेको जनाएको छ।