घोराही - नेकपा (माओवादी केन्द्र) घोराही उपमहानगरपालिका–११ समितिले ३०औँ जनयुद्ध दिवस तथा पार्टी प्रवेश कार्यक्रम सम्पन्न गरेको छ। घोराही–११, बरुवा गाउँमा आयोजित कार्यक्रममा विभिन्न पार्टी परित्याग गरी करिब ३८ जना माओवादी केन्द्रमा प्रवेश गरेका छन्।

कार्यक्रम नेकपा (माओवादी केन्द्र) वडा नम्बर ११ का अध्यक्ष बेगमबहादुर खड्काको अध्यक्षतामा सुरु भएको थियो। प्रमुख अतिथि माओवादी केन्द्रका उपाध्यक्ष एवं पूर्वसभामुख कृष्णबहादुर महरा रहनुभएको थियो। विशिष्ट अतिथिका रूपमा नेकपा (माओवादी केन्द्र) का केन्द्रीय सदस्य हेमराज शर्मा (डाइमण्ड) तथा घोराही नगरपालिकाका उपप्रमुख शक्तिराम डाँगीको उपस्थिति रहेको थियो। कार्यक्रममा अन्य स्थानीय नेता तथा कार्यकर्ताहरूको उल्लेख्य सहभागिता थियो।

कार्यक्रममा प्रमुख अतिथि महराले जनयुद्ध सुरु गर्दाका दिनहरू सम्झिँदै, जनयुद्धको दृष्टिकोण समयअनुसार परिर्वतनशील रहने बताउनुभयो। साथै, उहाँले देशको वर्तमान परिस्थिति नाजुक रहेको उल्लेख गर्दै, रोजगारीको अभावका कारण हजारौँ युवा विदेशिन बाध्य भएको धारणा व्यक्त गर्नुभयो। उहाँले विभाजित कम्युनिस्ट पार्टीहरूलाई एकजुट बनाउन व्यक्तिगत रूपमा पहल भइरहेको र एकता अपरिहार्य रहेको पनि बताउनुभयो।

विशिष्ट अतिथि हेमराज शर्मा (डाइमण्ड) ले बरुवा गाउँका बासिन्दाहरूलाई विभिन्न पार्टीहरूमा विभाजित नहुन आग्रह गर्नुभयो। साथै, स्थानीय समस्याहरू सम्बन्धित निकायसम्म पु-याउन माओवादी केन्द्र प्रतिबद्ध रहेको उहाँले स्पष्ट पार्नुभयो।