सोसल मिडिया
हाम्रो बारेमा
गोपनीयता नीति
Contact Us
युनिकोड
दाङ २८ माघ - दाङकाे राप्ती गाउँपालिकाले फोहर व्यवस्थापनलाई प्रभावकारी बनाउँदै स्रोतसाधनको पुनःप्रयोगलाई प्रोत्साहन गर्न नयाँ कदम चालेको छ।
राप्ती गाउँपालिका–२, पुण्यपुरमा फोहरमैला प्रशोधन उद्योग सञ्चालनमा आएको छ।जसले गाउँपालिकाको समग्र वातावरणीय व्यवस्थापनलाई नयाँ दिशा दिने विश्वास गरिएको छ ।
सोमबार आयोजित एक विशेष समारोहका बीच गाउँपालिका अध्यक्ष प्रकाश विष्टले उद्योगको उद्घाटन गर्नुभएको छ। उक्त उद्योग राप्ती गाउँपालिका र ईको फेमिली प्राइभेट लिमिटेड, हेटौंडाको सहकार्यमा स्थापना गरिएको हो ।
उद्घाटन समारोहमा बोल्दै अध्यक्ष विष्टले फोहर व्यवस्थापन गाउँपालिकाका लागि ठूलो चुनौती रहेको उल्लेख गर्दै यस उद्योगले वातावरण संरक्षणका साथै फोहरलाई पुनः प्रयोगयोग्य स्रोतमा रूपान्तरण गर्न टेवा पुग्ने बताउनुभयाे । “सफा, हराभरा र समृद्ध राप्ती निर्माणका लागि यो उद्योग महत्वपूर्ण कोसेढुङ्गा सावित हुनेछ”, अध्यक्ष विष्टले भन्नुभयो। गाउँपालिकाभित्र दैनिक रूपमा ठूलो मात्रामा उत्पन्न हुने फोहरमैला उचित व्यवस्थापनको अभावमा वातावरण प्रदूषण बढ्दै गएको अवस्थामा यो उद्योग सञ्चालनमा आउनु स्थानीयवासीका लागि राहतको विषय बनेको अध्यक्ष विष्टले जानकारी दिनुभयो।
उहाँका अनुसार फोहर प्रशोधन उद्योग सञ्चालनपछि जैविक तथा अजैविक फोहरको वर्गीकरण गरी पुनः प्रयोगयोग्य सामग्री उत्पादन गरिनेछ।जसले गाउँपालिकाको आर्थिक उपार्जनमा समेत योगदान गर्ने अपेक्षा गरिएको छ।
स्थानीय तहमा फोहर व्यवस्थापन मात्र नभई त्यसबाट आर्थिक उपार्जन गर्ने अवधारणाका साथ अघि बढेको भन्दै अध्यक्ष विष्टले यो योजना अब अन्य स्थानीय तहका लागि समेत प्रेरणाको स्रोत बन्ने दाबी गर्नुभयो।
समृद्ध राप्ती निर्माणको अभियानलाई टेवा दिने उद्देश्यले फोहरलाई नै आम्दानीको स्रोत बनाउने प्रयास सफल भएमा अन्य पालिकाले पनि यस्ता नवीनतम प्रविधि अपनाउने अध्यक्ष विष्टले जानकारी दिनुभयो ।
गाउँपालिकाले आगामी दिनमा फोहर व्यवस्थापनका अन्य नवीनतम उपायहरू पनि अवलम्बन गर्दै जाने बताउनुभयो । “फोहरलाई सही ढंगले व्यवस्थापन गर्न सकेमा त्यसलाई मोहरमा परिणत गर्न सकिन्छ, राप्ती गाउँपालिकाले यही सिद्धान्तलाई आत्मसात् गर्दै काम गरिरहेको छ”, अध्यक्ष विष्टले भन्नुभयो।
त्यस्तै अध्यक्ष विष्टले फोहरबाट मोहर बनाउने अभियानले दिगो विकास र वातावरणीय संरक्षणको नयाँ सम्भावना खोल्नेमा विश्वास गर्नुभयो।