दाङ - दाङमा ३९ हजार किशोरीलाई एचपीभी खोप लगाईने भएको छ । जिल्ला स्वास्थ्य कार्यालय दाङका भानु जोशीका अनुसार दाङका १० वटै पालिकाका ३९ हजार किशोरीहरुलाई एचपीभी खोप लगाउन लागिएको हो । राष्ट्रिय कार्यक्रम अनुसार माघ २२ गतेदेखि खोप लगाउने कार्यक्रम सुरु हुनेछ । केन्द्रमा फागुन ६ गतेसम्म कार्यक्रम चल्ने भएपनि दाङमा २ गते सम्म पूरा गर्ने लक्ष्य राखिएको छ ।

त्यस्तै दाङको तुलसीपुर उपमहानगरपालिकामा ११ हजार ३ सय ३९ जना किशोरीलाई एचपिभी खोप लगाइने भएको छ । तुलसीपुर उपमहानगरपालिका जनस्वास्थ्य प्रबद्र्धन महाशाखाको आयोजनामा महिला पाठेघरको मुखको क्यान्सर विरुद्धको खोप अभियान सञ्चालन तथा व्यवस्थापनको बिषयमा आईतबार तुलसीपुरमा भएको पत्रकारसंगको अन्तरक्रिया कार्यक्रममा यस्तो जानकारी दिईएकोहो ।

तुलसीपुर उपमहानगरपालिका जनस्वास्थ्य निरिक्षक बिमल केसीका अनुसार कक्षा ६ देखि १० कक्षासम्म अध्ययन गर्ने छात्रा तथा विद्यालय बाहिर रहेका १० देखि १४ बर्ष उमेर समूहका किशोरीहरुलाई यो खोप दिइनेछ ।

त्यसकालागि तुलसीपुरमा एक सय खोप केन्द्रमा २ सय ३७ स्वास्थ्य स्वयंसेविका तथा शिक्षिकाहरुलाई परिचालन गरिएको छ । तुलसीपुरमा माघ २२ गतेदेखि ३० गतेसम्म खोप लगाईसक्ने लक्ष्य राखिएको तुलसीपुर उपमहानगरपालिकाका स्वास्थ्य शाखा प्रमुख ओमप्रकाश न्यौपानेले बताउनुभयो । साभार लाइभ दाङ