चितवन - आम जनता पार्टी (आजपा) का अध्यक्ष एवं पूर्वमन्त्री प्रभु साहले प्रधानमन्त्री केपी शर्मा ओली नेतृत्वको सरकार सवै मोर्चामा असफल भइसकेको दाबी गर्नुभयाे । प्रधानमन्त्री ओलीको बोली, व्यवहार र काम मुलुकलाई अध्याँरोतर्फ धकेलिने खालको भएको टिप्पणी उहाँले गर्नुभयाे ।

चितवनको भरतपुरमा आज आजपा निकटको आईटी आर्मीको जिल्ला भेलालाई सम्बोधन गर्दै अध्यक्ष साहले सुशासन कायम गर्न र आर्थिक सुधार गर्ने सवालमा सर्वाधिक असफल भएको ओली सरकारको विकल्प खोज्नमा ढिलाई गर्न नहुने बताउनुभयाे ।  ‘संविधान र संसद्ले नचिन्ने राजनीतिक संयन्त्रको आतंक बन्द गर्नुहोस् । दुई तिहाईको दम्भ भ्रष्टाचारी जोगाउने आधारस्तम्भ बनाइएको छ । आवरणमा संविधान संशोधन भनियो, तर व्यवहारमा संविधानको चीरहरण गरियो,’ साहले भने, ‘ओली सरकारले अध्यादेश अघि अघि अनि संसद् पछि पछि बोलाउँने काम गर्दै राज्यको ढुकुटी लुटने काम गरिरहेको छ । बिचौलियाको सेटिङमा बनेको सरकार बिचौलियाकै लागि काम गरिरहेको छ ।’

वर्तमान सरकार नेपाली जनताको लागि ट्युमर पलाएकोजस्तो भएको टिप्पणी गर्दै उनले यसको विकल्प नेपाली जनताले खोजिरहेको बताउनुभयाे । विदेश सम्बन्ध धुमिल बनेको छ । बीआरआई फ्रेमवर्क सम्झौता ऋणको पासो त होईन भन्ने बहस छेडिएको उहाँले बताउनुभयाे ।

बिचौलियाको सेटिङमा बनेको वर्तमान सरकार अप्राकृतिक, अलोकतान्त्रिक र सिद्धान्त विपरित भएको उहाँले बताउनुभयाे ।  दलतन्त्रको पहिलो सिकार नेपाली निमुखा जनता भएको बताउदै उनले दुई दलीय शासनको दिवालीयाले शंकर पोखरेल र गगन थापाहरु हौसिएको टिप्पणी गरे । यिनीहरु अहिले कहिल्यै नभएको विकास एक महिनामा गर्ने भनेर अध्यादेशको धमाश अनि शासनको धक्कु लगाउन थालेको उहाँले बताउनुभयाे ।

उहाँले यी पात्रसँग जोडिएका विज्ञहरुको अनुहार हेर्न जरुरी रहेको बताउदै यिनीहरु जननिर्वाचित थलो संसद्लाई छलेर साँढे बनेर चल्न थालेको बताउनुभयाे ।