काठमाडौं - नेकपा (एकीकृत समाजवादी) पार्टीले आगामी दिनमा हुने सबै किसिमका चुनाव एक्लै लड्ने निर्णय गरेको छ ।

एकीकृत समाजवादीको काठमाडौंमा बसेको स्थायी कमिटी बैठकले आगामी निर्वाचनमा कलम चुनाव चिह्नका उम्मेदवारहरू एक्लै लड्ने निष्कर्ष निकालेको छ ।

यसका लागि जनतामा जाने पार्टीका उपाध्यक्ष एवम् प्रवक्ता जगन्नाथ खतिवडाले जनकारी दिनुभयो।

बैठकले पार्टी एकता नगर्ने र सुदृढीकरणमा ध्यान दिने निर्णय पनि गरेको उनले जानकारी दिनुभयो ।

बैठकले पार्टीलाई जनतासँग जोड्न जनसंघर्ष अभियान चलाउने निर्णय पनि गरेको छ । स्थायी कमिटी बैठकले पार्टीको केन्द्रीय सचिवालय गठन गरेको छ ।

सचिवालमा अध्यक्ष, सम्मानित नेता, वरिष्ठ नेता, वरिष्ठ उपाध्यक्ष, उपाध्यक्ष, महासचिव, उपमहासचिव र सचिवसहित २४ जना रहने खतिवडाले बताउनुभयो ।

बैठकले पाँच सदस्यीय केन्द्रीय कार्यालय गठन गरेको छ । पार्टीको आगामी कार्ययोजनालाई संशोधनसहित पारित गरेको छ ।

कार्यविभाजनका सन्दर्भमा आएका सुझावलाई अध्ययन गरि दुई दिनपछि टुंग्याउने खतिवडाले बताउनुभयो ।

खतिवडाले वामदेव गौतमलाई नेकपा एकीकृत समाजवादीमा ल्याउन छलफल भइरहेको बताउनुभयो । यसमा गौतम पनि सकारात्मक रहेको खतिवडाले बताउनुभयो ।

यसका लागि अन्य प्रक्रियाका कामहरू जारी रहेको उहाँले बताउनुभयो ।