दाङः दाङमा मोटरसाइकलको ठक्करबाट एक जनाको मृत्यु भएको छ । जिल्ला प्रहरी कार्यालय दाङका अनुसार घोराही–१४ लुहासुरका ५५ वर्षिय नन्दबहादुर घर्तीको मृत्यु भएको हो । 
आज साँझ डुम्मरगाउँबाट मिलनचोकतर्फ जाँदै गरेको लु.प्र.०२००१ प ०७४६ नम्बरको मोटरसाइकलले घर्तीलाई आज बेलुका साढे ७ बजेतिर घोराही बसपार्कमा ठक्कर दिएको हो । मोटरसाइकलको ठक्करबाट गम्भिर घाइते भएका घर्तीको राप्ती स्वास्थ्य विज्ञान प्रतिष्ठानको क्रममा राती ८ बजेतिर मृत्यु भएको जिल्ला प्रहरी कार्यालय दाङका प्रवक्ता डिएसपी इश्वर थापाले जानकारी दिनुभयो । 

मोटरसाइकलको ठक्करबाट अर्का एक जना महिला घाइते भएको  प्रहरीले जनाएको छ । मोटरसाइकलको ठक्करबाट घोराही–१४ कै ४५ वर्षिय मनमति नेपाली घाइते हुनुभएको छ । उहाँको प्रतिष्ठानमै उपचार भइरहेको छ । उहाँको अवस्था मध्यम रहेको प्रहरीले जनाएको छ । मोटरसाइकल र मोटरसाइकल चालक घोराही–१० नारायणपुरका २१ वर्षिय तिलक खड्कालाई प्रहरीले नियन्त्रणमा लिएर आवश्यक अनुसन्धान थालेको छ ।