दाङ - लुम्बिनी  प्रदेशका पूर्वसामाजिक विकास मन्त्री चन्द्रकेश  गुप्तामाथि आक्रमण प्रयास भएको  छ।  रुपन्देही क्षेत्र  नम्बर ५ को  ‘ख’ बाट प्रदेशसभा निर्वाचित गुप्तामाथि  लुम्बिनीमा आज  केही युवाले आक्रमणको प्रयास गरेका हुन् ।

युवकहरूको दुई समूहबिच उत्पन्न विवादका बिच सांसद गुप्ता आफ्नो कार्यालयतर्फ आउँदै गर्दा बाटोमा हातपात भएको इलाका प्रहरी कार्यालय लुम्बिनीका इन्चार्ज प्रहरी निरीक्षक दीपक मगरातीले जानकारी दिनुभयो ।

इलाका प्रहरी कार्यालय अगाडि गुप्ता सवार बागमती प्रदेश ३–०१ च ६६२७ नम्बरको गाडीलाई रोकेर युवाहरूको समूहले हातपातको प्रयास गरेपछि प्रहरीले उद्धार गरी उनलाई आफ्नो कार्यालयभित्र पुर्‍याएको हो ।

गुप्ताले आफूमाथि आक्रमणको प्रयास गरिएको  र गाडीमा सवार विधान्चल यादवको खुट्टामा चोट लागेको बताए । पूर्वसांसद फकरउद्दिन खाँका भतिज एजाज खान नेतृत्वको समूहले आफूमाथि आक्रमण गरेको सांसद गुप्ताले बताउनुभयो ।