काठमाडौँ - विश्व क्रिकेटमा उत्कृष्ट फिल्डरको पहिचान बनाएका दक्षिण अफ्रिकाका दिग्गज खेलाडी जोन्टी रोड्स नेपाल प्रिमियर लिग (एनपीएल) को टोली पोखरा एभेन्जर्समा तीन वर्षको सम्झौतासहित आबद्ध भएका छन् ।

जोन्टी रोड्सलाई परामर्शदाता र सल्लाहकारका रूपमा नियुक्त गरेको पोखरा एभेन्जर्सले जनाएको छ । जोन्टीलाई आफ्नो टोलीमा पाउँदा निकै उत्साहित भएको र उनको अनुभवले युवा खेलाडीको क्षमता वृद्धि गर्न सहयोग पुर्‍याउने पोखरा एभेन्जर्सका सञ्चालक मनोबल श्रेष्ठले बताएका छन् ।

दक्षिण अफ्रिकाका पूर्वक्रिकेटर जोन्टी रोड्सले इन्डियन प्रिमियर लिग (आईपीएल) को टोली मुम्बई इन्डियन्ससँग काम गरिसकेका छन् भने अहिले लखनउ सुपर जायन्ट्समा आबद्ध छन् । पोखरा एभेन्जर्सको मेन्टरका रूपमा नियुक्त भएपछि उनले टिमलाई बलियो बनाउन प्रयास गर्ने बताए ।

पोखराले चार विदेशी खेलाडीको कोटामा तीन जनालाई अनुबन्ध गरिसकेको छ । पोखराले विदेशी खेलाडीका रूपमा अमेरिकाका आन्द्रेस गौस, नेदरल्यान्ड्सका बास डे लीड र वेस्ट इन्डिजका एन्डसन फिलिपलाई भित्र्याएको हो ।