काठमाडौं -   प्रधानमन्त्री केपी शर्मा ओलीसमक्ष नवनियुक्त तीनजना राज्यमन्त्रीले पद तथा गोपनीयताको सपथ लिएका छन् ।

प्रधानमन्त्री तथा मन्त्रिपरिषद्को कार्यालय सिंहदरबारमा शुक्रबार आयोजित समारोहमा प्रधानमन्त्री ओलीसमक्ष तीन राज्यमन्त्रीले सपथ लिएका हुन् ।

सपथ लिनेमा संस्कृति, पर्यटन तथा नागरिक उड्डयन राज्यमन्त्री अरुणकुमार चौधरी, वन तथा वातावरण राज्यमन्त्री रुपा विक र ऊर्जा, जलस्रोत तथा सिँचाई राज्यमन्त्री पूर्णबहादुर तामाङ रहेका छन् ।

सपथ कार्यक्रममा उपप्रधानमन्त्रीहरू, मन्त्रीगण, मुख्यसचिव, उच्चपदस्थ अधिकारी सहभागी थिए। योसँगै २५ सदस्यीय मन्त्रिपरिषद्ले पूर्णता पाएको छ ।

प्रधानमन्त्री ओली गत असार ३० गते नियुक्त भएका थिए । यसअघि असार ३१ गते ओलीसहित मन्त्रिपरिषद्का २२ जना सदस्यले सपथ लिएका थिए ।

अघिल्ला सरकारका पालामा ढल्ने बेलासम्म सरकारले पूर्णता पाउने गरेका थिएनन् । तर नेपाली कांग्रेस र नेकपा एमालेको गठबन्धनले साना दललाई पनि मिसाएर दुई पटकमै सरकारलाई पूर्ण आकारको बनाउन सफल हुनु भएको छ ।

प्रधानमन्त्री केपी शर्मा ओलीले पद तथा गोपनीयताको शपथ ग्रहण गर्नु भएको छ । सोमबार नवनियुक्त प्रधानमन्त्री ओलीले राष्ट्रपति कार्यालय शीतल निवासमा शपथ लिएका हुन् ।

असार ३१ मा ओलीसँगै उपप्रधान तथा सहरी विकास मन्त्री प्रकाशमान सिंह र उपप्रधान तथा अर्थमन्त्री विष्णु पौडेलले शपथ लिनु भएको थियो।

त्यसैगरी, उहँ नेतृत्वको सरकारमा १९ मन्त्रीले पनि त्यही दिन शपथ लिएका थिए । राष्ट्रपति रामचन्द्र पौडेलले ओली लगायत मन्त्रीहरूलाई शपथ ग्रहण गराउनु भएको थियो ।

ओली नेतृत्वको सरकारमा कांग्रेस, एमाले, जनता समाजवादी पार्टी, लोकतान्त्रिक समाजवादी पार्टीले त्यसबेला मन्त्री पठाएका थिए । यस पटक नागरिक उन्मुक्ति पनि मिसिएर क्याबिनेटले पूर्णता पाएको छ ।  प्रधानमन्त्रीओली नेतृत्वको क्याबिनेट पूर्ण २५ सदस्यीय भएको छ ।